Albaniyanın süni intellekt naziri “həbs edildi”: Rüşvət üstündə

Albaniyanın dövlət idarəçiliyinin rəqəmsallaşdırılması üzrə milli təcrübəsi, ilk süni intellekt (AI) sistemi, nazir vəzifəsinə təyin edilmiş "Diella" korrupsiya qalmaqalının mərkəzinə düşüb.

Publika.az xəbər verir ki, bu barədə dekabrın 4-də mənbələrə istinadən "Newsbar" məlumat yayıb.

Qeyd olunur ki, Albaniyanın Korrupsiya və Mütəşəkkil Cinayətkarlıqla Mübarizə üzrə Xüsusi Prokurorluğu dövlət idarəçiliyinin rəqəmsallaşdırılması üzrə eksperimenti dayandırıb və süni intellekti “oflayn rejimə” keçirib.

Məlum olub ki, hər bir müqavilənin dəyərinin 10-15%-nin AI-nin "standart əməliyyat protokolu" kimi şərh etdiyi naməlum hesablara köçürülüb. Neyroşəbəkə bu hərəkətləri zəruri hesab edib və onları cinayət kimi tanımayıb.

Prokurorluq həmçinin bildirib ki, süni intellekt kriptovalyutadan öz təkmilləşdirmələri, o cümlədən server və proqram təminatının alınması üçün istifadə etməyi planlaşdırır.

Nəşr iddia edir ki, nazirin süni intellekt üzrə vəkili müvəkkilinin hərəkətlərinə haqq qazandıran bəyanat hazırlayıb və bunu korrupsiya yox, “stress testi” adlandırıb.

Xatırladaq ki, "Diella" sentyabrın 11-də dövlət satınalmaları naziri təyin edilib. Oktyabrın 27-də isə Albaniyanın baş naziri Edi Rama "Diella"nın hamilə olduğunu və onun “övladlarının” məmurlara işlərində köməklik edəcəyini açıqlayıb.

Adəm