31-ci dəfə ata olan çoxarvadlı Suxov ona qarşı cinayət işinin dayandırılmasını istəyir

Rusiyada yaşayan və çoxarvadlılığı ilə tanınan İvan Suxovun 31-ci övladı dünyaya gəlib. Bu hadisəni əsas gətirən ata azyaşlı qızı ilə bağlı açılmış cinayət işinin dayandırılmasını tələb edib.

Bu barədə İ.Suxovun vəkili Aleksandr Poçuev "Veçernyaya Moskva"ya bildirib.

"İvanın 31-ci övladı olan oğlan uşağı dünyaya gəlib. Hələ ad seçilməyib. Bu bayramla əlaqədar İstintaq Komitəsinin sədri Aleksandr Bastrıkinə İvana yaddaqalan bir hədiyyə vermək və nəhayət, uzun sürən cinayət işinə son qoymaq təklifi ilə müraciət etdim", - deyə o bildirib.

Vəkil qeyd edib ki, Suxova qarşı cinayət işi beş aydır ilkin istintaq mərhələsindədir. Bu arada, atasını cinsi təcavüzdə ittiham edən qızı Anna prosesdə demək olar ki, iştirak etmir.

"Anna istintaqda iştirakdan yayınır, üzləşmələrə gəlmir. İvanın günahkarlığına dair kifayət qədər dəlil yoxdur. Onun özü və ailəsi bu müddət ərzində ictimai qınaq altında qalıb və emosional baxımdan çox əzab çəkirlər", - A.Poçuyev əlavə edib.

O bildirib ki, qızının ittihamlarına cavab olaraq Suxov hüquq-mühafizə orqanlarına böhtan iddiası ilə müraciət edib. Lakin vəkilin sözlərinə görə, bu iş üzrə icraat hazırda dayandırılıb.

İvan Suxovun 40 yaşı var. O, 2024-cü ilin dekabr ayında jurnalist Saşa Sulimlə müsahibəsindən sonra geniş şöhrət qazanıb. Müsahibədə o, 12 qadından 30 uşaq böyütdüyünü açıqlayıb. İlk yeddi uşaq Suxovun 16 yaşı olanda dünyaya gəlib.

Sentyabrda çoxarvadlı kişiyə azyaşlı qızına qarşı seksual xarakterli davranışla bağlı (Rusiya Cinayət Məcəlləsinin 135-ci maddəsinin 1-ci hissəsi) ittiham irəli sürülüb. İş Rusiya federal televiziya kanalında uşaqların bakirəliyinin pozulması ilə bağlı irəli sürülən iddialara əsaslanıb. İyunun 9-da Rusiyanın Birinci Kanalında yayımlanan "Qoy danışsınlar" verilişində Suxovun 19 yaşlı qızı Anna 14 yaşından bəri atası tərəfindən təcavüzə məruz qaldığını bildirib. (Oxu.Az)