"iPhone" istifadəçilərinə xəbərdarlıq: Cihazlar bloklanır, pul tələb olunur

Rusiyada "iPhone" istifadəçilərini hədəf alan yeni kiberdələduzluq sxemi aşkarlanıb.

Publika.az xəbər verir ki, bu barədə “Qazeta.ru” məlumat yayıb.

Bildirilib ki, fırıldaqçılar “Telegram” kanalları vasitəsilə insanlara ödənişli tətbiqləri pulsuz quraşdırmaq və ya başqasının Apple ID-si ilə giriş kimi təkliflər edirlər.

Məlumata görə, istifadəçi həmin Apple ID-yə daxil olan kimi onun “iPhone”-u “Lost Mode” (itirilmiş rejim) vasitəsilə uzaqdan bloklanır. Daha sonra cihazın açılması üçün 100-500 avro tələb olunur. Razılaşmayan istifadəçilərə isə cihazın tam bloklanacağı ilə hədə-qorxu gəlinir.

Mütəxəssislər bildirir ki, bu sxem xüsusilə təhlükəlidir, çünki bəzi hallarda başqa Apple ID-yə giriş zamanı həqiqətən tətbiq yükləmək mümkün olduğu üçün istifadəçilər aldanır.

Ekspertlər bildiriblər ki, şəxsi cihazda heç bir halda başqasının Apple ID-sinə daxil olmaq olmaz. Əks halda cihazın blokdan çıxarılması çətinləşir və proses həftələrlə, hətta aylarla davam edə bilər.

Müəllif: Roza