Rusiyada neft emalı çöküb: Hindistan və Çin köməyə gəlir

İyul ayında Rusiya neft emalı zavodlarında neft emalı həcmi 2005-ci ildən bəri ən aşağı səviyyəyə düşüb.

Publika.az xəbər verir ki, bu barədə “Bloomberg” məlumat yayıb.

Bu ayın ilk həftələrində Rusiyanın neft emalı zavodları gündə 3,91 milyon barel xam neft emal edib ki, bu da iyun ayı ilə müqayisədə 40 min barel az, may ayı səviyyəsindən 673 min barel az və ilin əvvəli ilə müqayisədə 1,445 milyon barel azdır.

Keçən ilin iyul ayı ilə müqayisədə neft emalı zavodlarının istifadəsi 27% və ya gündə 1,424 milyon barel, müharibədən əvvəlki 2021-ci ilin iyul ayı ilə müqayisədə isə 30% və ya gündə 1,649 milyon barel azalıb.

Son 100 gün ərzində Ukrayna dronları neft emalı zavodlarına təxminən 50 dəfə hücum edərək 34 ən böyük neft emalı zavodundan ən azı 24-nü vurub. Dronlar təkcə Rusiyanın Mərkəzi hissəsindəki neft emalı zavodlarını deyil, həm də Ukrayna sərhədindən 2500 kilometr məsafədə yerləşən Omsk neft emalı zavodu da daxil olmaqla, Uralın kənarındakı neft emalı zavodlarını hədəf alıb.

“Energy Intelligence” analitikləri Rusiyada hazırkı neft emalı həcmlərinin daha da aşağı olduğunu təxmin edirlər - gündə 3,58 milyon barel ki, bu da ən azı 2002-ci ildən bəri ən aşağı səviyyə ola bilər. “Energy Intelligence” yazır ki, hazırda gündə 3,1 milyon barel emal gücü boşdur və neft istehsalçılarının onu nə vaxt işə sala biləcəyi bəlli deyil.

Rusiyada ən böyük olan Omsk Neft Emalı Zavodu (gündə 420.000 barel tutumu ilə) ilə yanaşı, ən güclülərindən biri olan (gündə 340.000 barel) “Tatneft” şirkətinin “Taneco” neft emalı zavodu da fəaliyyətini dayandırıb. “Energy Intelligence” Rusiyanın neft məhsulları çatışmazlığının hazırda ayda 400.000-600.000 ton olduğunu təxmin edir və əlavə edir ki, Belarus və Qazaxıstandan tədarük bu kəsirin yalnız yarısını ödəyə bilər.

“Kpler”in sözlərinə görə, Hindistan benzini daşıyan tankerlər artıq Rusiyaya gedir və ehtimal ki, bu, Hindistanın “Nayara Energy” şirkəti tərəfindən təmin edilir (49%-i “Rosneft”ə məxsusdur). Bundan əlavə, “Energy Intelligence”in məlumatına görə, sənaye mənbələri Çindən Uzaq Şərqə tanker yük maşınları ilə çatdırılan az miqdarda benzin tədarükünün olduğunu bildirir.

Müəllif: Tural