Dəhşətli hesabat yayıldı: Avropada "hazır olun" xəbərdarlığı verildi

Avropada 2026-cı ilin yayı ilə bağlı açıqlanan yeni hesabat qitədə iqlim böhranının təsirlərinin daha da dərinləşdiyini ortaya qoyub.

Publika.az “Reuters”ə istinadən xəbər verir ki, Avropa İttifaqının “Copernicus” İqlim Dəyişikliyi Xidmətinin hesabatına görə, 2026-cı ilin yayı Avropada tarixin ən isti üçüncü yayı olub.

İyun-avqust aylarında Qərbi Avropada səth hava temperaturu son 10 ilin orta göstəricisindən 2,5 dərəcə yüksək qeydə alınıb. Regionun ən azı 60 faizində 17 gün ərzində temperatur 30 dərəcəni keçib.

Hesabata əsasən, təkrarlanan ekstremal istilər on minlərlə insanın ölümünə, kənd təsərrüfatına ciddi zərər dəyməsinə və bəzi enerji stansiyalarının fəaliyyətini dayandırmasına səbəb olub.

Lakin təhlükə yalnız yüksək temperaturla məhdudlaşmayıb. Avropanın su ehtiyatlarında da ciddi azalma müşahidə edilib. Çaylarda 30 ildən çox müddətin ən aşağı su axını sürəti qeydə alınıb. Dəniz səthinin temperaturu da rekord səviyyəyə yüksəlib.

Quraqlıq və yüksək temperatur meşə yanğınlarının miqyasını daha da artırıb. Sentyabrın sonuna qədər 680 min hektar ərazi yanıb. Bununla 2026-cı il Avropada qeydə alınmış ən ağır üçüncü meşə yanğını ili olub.

Mütəxəssislər hökumətləri qalıq yanacaqlardan istifadənin azaldılması, şəhərlərin yaşıllaşdırılması, binalarda kölgələndirmənin artırılması, xəstəxana və məktəblərdə kondisioner sistemlərinin genişləndirilməsi istiqamətində tədbirlər görməyə çağırıblar.

Müəllif: Roza