Bu, etiraz deyil, “sakit işğal”dır - Maskdan Fransa açıqlaması

Amerikalı milyarder İlon Mask Fransadakı məktəbli etirazlarına reaksiya verib.

Publika.az xəbər verir ki, Mask bu barədə sosial mediada yazıb.

O, Fransada baş verənləri “sakit işğal” adlandırıb. Milyarder bu “işğalı” dəstəkləyənlərin isə vətən xaini olduğunu bildirib.

O, bu şərhi ABŞ prezidenti Donald Trampın açıqlamasının yenidən paylaşılmasına cavab olaraq yazıb. Çərşənbə axşamı Tramp Fransadakı etirazları nəzarətdən çıxmış kütləvi miqrasiya vəziyyəti ilə əlaqələndirib və əlavə edib ki, təhsil sistemindəki problemlərin bununla heç bir əlaqəsi yoxdur.

Mask işğalı dəstəkləyənlərin xainlərin taleyinə layiq olduğunu bildirib. Lakin o, Fransanı kimin işğal etdiyini dəqiqləşdirməyib.

Fransada orta məktəb şagirdləri artıq ikinci həftədir ki, həddindən artıq yüklənmiş dərs cədvəlləri, müəllim çatışmazlığı və təhsildəki digər problemlərə etiraz edirlər. Bəzi etirazlar hətta iğtişaşlara çevrilib.

Son məlumatlara görə, Fransada əksəriyyəti yetkinlik yaşına çatmayan 6000-dən çox insan saxlanılıb.

Müəllif: Tural