ABŞ və Rusiya arasında gizli razılaşma müzakirələri: Bu məsələlər gündəmdə

ABŞ prezidenti Donald Trampın və Rusiya prezidenti Vladimir Putinin komandaları Rusiya enerji bazarında Amerika şirkətlərinin fəaliyyətinin bərpası məsələsini müzakirə edirlər.

Publika.az xəbər verir ki, bu barədə “RBC-Ukrayna” “Financial Times” nəşrinə istinadən məlumat yayıb.

Bu məsələlər Rusiya-Ukrayna müharibəsinin nizamlanması ilə bağlı sülh danışıqları çərçivəsində müzakirə olunur.

Mümkün razılaşmalar arasında ABŞ şirkətlərinin Rusiyanın Uzaq Şərqində “Saxalin-1” layihəsi çərçivəsində neft hasilatına yenidən qoşulması və Rusiyanın “Drujba” boru kəməri ilə Avropaya neft tədarükünün bərpasında ABŞ-ın iştirakı da var.

Bundan əlavə, tərəflər Rusiyadan ABŞ-a titan ixracının bərpası imkanını nəzərdən keçirirlər. Bu metal, xüsusilə, aviasiya sənayesində istifadə olunur.

Müzakirə olunan digər variant ABŞ aviaşirkətlərinə yanacaq xərclərini azaltmaq üçün Rusiyanın hava məkanından tranzit uçuşlarda istifadə etməyə imkan verəcək razılaşmadır.

Bununla belə, “Financial Times”ın mənbələri tərəflərin əməkdaşlıq şərtləri ilə bağlı mövqelərinin ciddi şəkildə fərqləndiyini bildiriblər. Moskva ABŞ-la iqtisadi əlaqələri mümkün qədər tez bərpa etməyə çalışır. Ağ Ev administrasiyasının nümayəndələri isə razılaşmaların əldə olunmasını Ukraynada müharibənin dayandırılması ilə əlaqələndirirlər.

Nəşrin həmsöhbətlərindən biri bildirib ki, iqtisadi razılaşmalar müharibəyə son qoyacaq ümumi sülh sazişinin bir hissəsi olacaq. Bununla yanaşı, yekun qərarların hələ qəbul edilmədiyi vurğulanıb.

Qərb diplomatlarının fikrincə, sülhə nail olmağın qarşısındakı əsas maneələrdən biri Putinin mövqeyidir. Onların qiymətləndirməsinə görə, Kreml rəhbəri ABŞ-la iqtisadi razılaşmalar müqabilində hərbi əməliyyatları dayandırmağa hələ hazır deyil.

Mənbələrdən biri bunu belə ifadə edib: “Putin üçün məsələ pulda deyil, alçaldılma və nəzarətlə bağlıdır”.