Keçmiş həyat yoldaşı İlon Mask haqqında görün nələr dedi

İlon Maskın keçmiş həyat yoldaşı Castin Mask milyarderin xarakteri və iş prinsipləri ilə bağlı diqqətçəkən açıqlamalar verib. O, Maskın demək olar ki, istənilən problemi “ölüm-dirim məsələsi”nə çevirdiyini və daim son dərəcə təcili şəraitdə yaşamağa alışdığını bildirib.

Publika.az xəbər verir ki, Castin Mask bu fikirləri jurnalist Kara Svayzerə verdiyi müsahibədə səsləndirib.

Söhbətdə rejissor Aleks Gibni də iştirak edib. Müsahibə onun İlon Mask haqqında hazırladığı “MUSK” sənədli filminin nümayişindən əvvəl yayımlanıb.

Castin Mask keçmiş ərini belə xarakterizə edib: “O, uçurumun kənarından tullana və artıq düşərkən özünə paraşüt düzəldə bilən insandır. Məncə, o, həqiqətən də xaosda çiçəklənir”.

Onun sözlərinə görə, bu xüsusiyyət Maskın rəhbərlik etdiyi şirkətlərdə də özünü göstərir. Keçmiş və hazırkı əməkdaşlar daha əvvəl bildiriblər ki, milyarderin şirkətlərin fəaliyyətinə müdaxiləsinin artması prioritetlərin kəskin dəyişməsinə, təcili toplantıların keçirilməsinə və yüzlərlə mühəndisin olduğu qrup çatlarının yaradılmasına səbəb olub.

Castin Mask hesab edir ki, keçmiş ərinin yaratdığı gərginlik ətrafındakı insanları da prosesə cəlb edə bilir. “O, bu xaosu özü ilə gətirir və başqalarını da ona cəlb etməyi bacarır. Əvvəlcə bu, çox vaxt ruhlandırıcı görünə bilər”, - deyə o bildirib.

Castin Maskın sözlərinə görə, İlon Maskın davranışında müəyyən “metod” olduğunu düşünmək olar, lakin bu, bəzən “əl çevikliyi”nə də bənzəyir.

Müəllif: Adəm