Azərbaycanın Həvvası Ermənistana keçdi - FOTO

Azərbaycanda qorunan bəbir Ermənistan ərazisində yerləşən Xosrov qoruğuna keçib.

Publika.az xəbər verir ki, bu barədə Ümumdünya Təbiəti Mühafizə Fondu məlumat yayıb.

Məlumatda bildirilib ki, bu bir daha Qafqazda bəbir populyasiyasının bərpası Zəngəzur və Hirkan milli parklarından başladığını sübut edir:

“Ötən 3 il ərzində Həvva adlandırdığımız ana bəbir 3 bala böyüdüb. Bu balalardan biri Zəngəzur silsiləsi boyunca yeni ərazilər kəşf etməyə yollanıb və bu yaxınlarda Dərələyəz silsiləsini də aşaraq Xosrov qoruğunda kameralara düşüb. Bəbirin getdiyi məsafə düz xətt boyunca bu 165-170 km bərabərdir, dağ yolları ilə isə hesablasaq bu 250 km-dən çox edir. Bu bir daha bizim əvvəlki fikirlərimizi təsdiq etdi - Qafqazda bəbir populyasiyasının bərpası Zəngəzur və Hirkan milli parklarından başlayır”.

Məlumatda bildirilib ki, bəbirlər adətən, teritorial heyvanlar olurlar, bir ərazini mənimsəyib, oranı digər fərdlərdən qoruyurlar.

“Onların sayları artdıqca populyasiya sıxlığı da artır və gənc fərdlər yeni əraziləri kəşf etməyə gedirlər. Zəngəzurda artıb çoxalmağa hazır olan 2, Hirkanda isə 1 cütlük mütəmadi olaraq tərəfimizdən qeydə alınır. Son 3 ildə cəmi 5 bala böyüyüb ətrafa yayılıb”.