FHN-in Akademiyasında Beynəlxalq Müəllimlər Günü qeyd olundu - FOTO

Oktyabrın 4-də Fövqəladə Hallar Nazirliyinin (FHN) Akademiyasında Beynəlxalq Müəllimlər Günü münasibətilə tədbir keçirilib.

FHN-dən Publika.az-a bildiriblər ki, tədbirdə Akademiyanın rəisi, general-mayor Baba Salayev ali təhsil ocağının müəllim heyətini Beynəlxalq Müəllimlər Günü münasibətilə təbrik edib. O bildirib ki, müəllimlik dünyada ən çətin, eyni zamanda, ən şərəfli peşə olmaqla, gənc nəslin tərbiyəsində, onların dünyaya baxışın formalaşmasında böyük rola malikdir. Müəllim adı hər zaman ucalıq, ziyalılıq və mənəvi saflıq rəmzi kimi təcəssüm olunur, böyük hörmət və yüksək ehtiramla çəkilir. Müəllim peşəsini yüksək qiymətləndirən ümummilli liderimiz Heydər Əliyevin “Həyatını müəllimliyə həsr edən insanlar həqiqətən fədakar, xalqına, millətinə sədaqətli və eyni zamanda, qəhrəmanlıq göstərən insanlardır” kəlamını xatırladan natiq Ulu Öndərin respublikamıza rəhbərliyinin bütün dövrlərində müəllim əməyinə çox yüksək qiymət verdiyini diqqətə çatdırıb.

Akademiyanın rəisi bildirib ki, Ulu Öndərin siyasi kursunun layiqli davamçısı, Azərbaycan Respublikasının Prezidenti İlham Əliyev də milli təhsilin inkişafına, müəllimlərin sosial rifah halının yaxşılaşdırılmasına xüsusi diqqət və qayğı ilə yanaşır. Ölkəmizdə aparılan yenidənqurma işləri, iqtisadiyyat, mədəniyyət və sosial sahələrdə reallaşdırılan islahatlar təhsilin inkişafına da müsbət təsir göstərir.

Tədbirdə Bakı Musiqi Akademiyasının tələbələrinin ifasında müxtəlif musiqilər və rəqslər ifa olunub, şeirlər oxunub.