Qırışlar sizi etibarsız biri kimi göstərir - ARAŞDIRMA

Almaniyanın Berlin Humboldt Universitetinin apardığı araşdırma qırışları olan insanların daha az xoşagəlimli olduğu və etibarsız hesab edildiyini müəyyən edib.

Publika.az xarici mətbuata istinadən xəbər verir ki, tədqiqat üçün 353 iştirakçıdan üzlərində qırış olan və ya olmayan insanların fotolarının qiymətləndirmələri istənilib.

İştirakçılar hər bir insanın cəlbedici, isti, xoş, etibarlı, əxlaqlı və harmoniyada görünüb-görünmədiyini qiymətləndirib. Bundan başqa, hər bir üzdə xoşbəxtlik, qəzəb, kədər, qorxu, iyrənclik və təəccüb hissinin ifadəsi qeydə alınıb.

“Acta Psychologica” jurnalında dərc edilən təhlillər nəticəsində məlum olub ki, qırışmış üzlər qarşı tərəfdə daha az cəlbedici görünür, həmçinin daha az xoş və etibarlı təəssürat yaradır.

"Bu nəticələr yaşlı insanların üzündəki qırışlara görə, daha az bəyənildiyini göstərir. Qırışların mənfi təsirləri gözəllik sənayesinin daha çox inkişafına, eləcə də hamar alınlara və uzunsov çənələrə olan tələbatın artmasına səbəb olacaq", - tədqiqatçılar qeyd edib.

Aytən