Yanacağın qiyməti hər yerdə dəyişir – Professor

“Neft məhsullarının, benzin və dizelin Azərbaycanda qiymətlərinin qalxması dünyada gedən proseslərlə əlaqədardır. Neftin və yanacağın qiyməti hər yerdə dəyişir. Əgər başqa ölkələrdə neft məhsullarının qiyməti dəyişirsə, biz də bunun istehsalçısıyıqsa, deməli, biz də yanacaq məhsullarını baha qiymətə satmalıyıq”.

Bunu Publika.az-a açıqlamasında iqtisad elmləri doktoru, professor Əli Əlirzayev deyib.

Ekspertin fikrincə, yanacaq məhsullarını aşağı qiymətə satanda biz onun yerini başqa bir məhsulla doldurmalıyıq: “İndiki şəraitdə də bunu etmək qeyri-mümkündür. Çünki kənd təsərrüfatı məhsullarının dünya bazarına çıxarılmasının miqdarı xeyli aşağı düşüb. Azərbaycan iqtisadiyyatı isə neft məhsullarından gələn gəlirlər hesabına formalaşıb. Ona görə neftin, neft məhsullarının qiyməti harada dəyişirsə, bu dəyişikliklərin bizdə də getməsi labüddür. Bütün dünyada yanacağın qiyməti dəyişir, bahalaşır. Bu səbəbdən də bizdə də neft və neft məhsullarının qiyməti yenidən tənzimlənir”.

Professorun qənaətinə görə, ola bilsin ki, bununla bağlı tənzimləmə siyasəti də həyata keçirilsin:

“Ölkələrin inkişaf dinamikası var. Əgər başqa ölkələrdə qiymət bahalaşsa, bizdə ucuz qalsa, o zaman yanacaq məhsullarımızın gizli yollarla başqa ölkələrə aparılması mümkündür. Hesab edirəm ki, yanacaq məhsullarının qiyməti ucuz olan ölkədən qiymətlərin baha olduğu ölkələrə aparılmasının qarşısı alına bilər. Təbii ki, indi bizdə belə hal yoxdur. Amma mümkün ehtimalları da nəzərə almaq lazımdır. Lakin limit də olmalıdır ki, daxildə filan qədər yanacaq idxalına kimi qiymət dəyişməsin. Hesab edirəm ki, differensiallaşma və qütbləşmə siyasəti aparılmalıdır ki, qazanc məqsədi ilə istifadə edildikdə, qiymətlər baha olsun”.

Tural Turan