Bakının mərkəzində KÜTLƏVİ DAVA - Ölənlər var - YENİLƏNDİ

Nərimanov rayon prokurorluğu Bakıda kütləvi dava ilə bağlı məlumat yayıb.

Prokurorluqdan Publika.az-a verilən məlumata görə, fevralın 18-də saat 01 radələrində Nərimanov rayonu ərazisində 1990-cı il təvəllüdlü Şahin Bayramov və 1992-ci il təvəllüdlü Fərid Əlirzayevin aldıqları bıçaq xəsarətlərindən ölmələri barədə rayon prokurorluğuna məlumat daxil olub.

Dərhal prokurorluq və polis əməkdaşları tərəfindən məhkəmə-tibb ekspertinin iştirakı ilə hadisə yerinə və meyitlərə baxış keçirilib.

Araşdırmalarla Nərimanov rayonu, Təbriz küçəsində bir qrup şəxs – bir tərəfdən Şahin Bayramov və Fərid Əlirzayev, qarşı tərəfdən isə Nurani Məmmədov və digər şəxslər arasında kəsici-deşici alətlərdən istifadə edilməklə yaranmış münaqişə zəminində qərəzli xuliqanlıq hərəkətləri nəticəsində aldıqları xəsarətlərdən Şahin Bayramov və Fərid Əlirzayevin ölmələri müəyyən olunub.

Faktla bağlı Nərimanov rayon prokurorluğunda Cinayət Məcəlləsinin 120.2.7 (iki və ya daha çox şəxsi öldürmə) və 221.3-cü (silah qismində istifadə olunan əşyalar tətbiq etməklə xuliqanlıq etmə) maddələri ilə cinayət işi başlanıb.

Həyata keçirilmiş təxirəsalınmaz tədbirlər nəticəsində Nurani Məmmədov şübhəli şəxs qismində tutularaq istintaqa cəlb edilib.

Hazırda cinayət işi üzrə tam, hərtərəfli və obyektiv istintaq aparılmaqla təqsirli şəxslərin dairəsinin müəyyən edilərək məsuliyyətə cəlb olunmaları istiqamətində zəruri istintaq-əməliyyat tədbirləri davam etdirilir.

xxx

09:18

Ötən gecə Bakı şəhər Nərimanov rayonu Təbriz küçəsində bir qrup şəxs arasında kütləvi dava dalaş olub.

Publika.az-ın əldə etdiyi məlumata görə, Təbriz küçəsi 16 ünvanının qarşısında baş verən dava zamanı 1990-cı il təvəllüdlü Bayramov Şahin Ələkbər oğlu və 1992-ci ildə anadan olmuş Əlirzayev Fərid Adil oğlu bıçaqlanaraq öldürülüb.

Hadisə ilə bağlı əməliyyat qrupu yaradılıb. Faktla bağlı Cinayət Məcəlləsinin 221.3 və 120.2.7-ci maddələri ilə iş açılıb. Araşdırmalar aparılır.

xxx

01:21

Bakıda qətl hadisəsi baş verib.

Publika.az">Publika.az xəbər verir ki, hadisə Nərimanov rayonunda qeydə alınıb. Təbriz küçəsində kütləvi dava zamanı 1993-cü il təvəllüdlü Alirzayev Fərid Adil oğlu ürəyindən bıçaqlanan qətlə yetirilib.

Hadisənin təfərrüatı Nərimanov rayon Prokurorluğunda araşdırılır.