Yaşlı qadını aldadan su idarəsinin "əməkdaşı" həbs olundu

Bakıda özünü su idarəsinin əməkdaşı kimi qələmə verib, yaşlı ev sahibini aldadan şəxs həbs olunub.

Publika.az "Qaynarinfo"ya istinadən xəbər verir ki, hadisə bir neçə gün əvvəl paytaxtın Binəqədi rayonunda baş verib.

Belə ki, 1991-ci il təvəllüdlü Şamil Əfəndiyev saat 15:30-da evin qapısını döyərək, özünü su idarəsinin işçisi kimi təqdim edib və evin yaşlı sakini Raisə adlı qadına sayğacın xarab olduğunu, bu səbəbdən artıq pul yazdığını və dəyişdirilməli olduğunu deyib. Bundan sonra isə ona 500 manat pul qaytarılacağını bildirib.

O, sayğacın dəyişdirilməsi üçün 240 manat pul istəyib. Qadın isə ona inanıb, xırda pulu olmadığına görə 300 manat verib. Həmin şəxs pulu xırdalamaq adı ilə həyətə düşərək ərazini tərk edib.

Onun zərərçəkmiş qadının "Nokia" markalı mobil telefonunu oğurlayıb getdiyi də məlum olub.

Dərhal hadisə ilə bağlı Daxili İşlər Nazirliyinin "102" xidmətinə və Binəqədi Rayon Polis İdarəsinin 7-ci Polis Şöbəsinə məlumat verilib və faktla bağlı araşdırma başlayıb.

Təqsirləndirilən şəxs saxlanılaraq, məhkəmə qarşına çıxarılıb. Məhkəmənin hökmü ilə Şamil Əfəndiyev İnzibati Xətalar Məcəlləsinin 227-ci maddəsində nəzərdə tutulmuş inzibati xətanı törətməkdə təqsirli bilinib və 3 ay müddətə həbs edilib.