79 yaşlı nənəyə bu supermarketlərə giriş qadağan edildi - Səbəb nədir?

Böyük Britaniyada yaşayan 79 yaşlı Rita Seymur məşhur “Sainsbury’s” supermarketlər şəbəkəsinin bütün mağazalarına girişinin ömürlük qadağan edilməsindən şikayətlənib.

Publika.az xəbər verir ki, hadisə iyun ayında baş verib.

Rita Seymurun sözlərinə görə, o, yaxınlıqdakı mağazaya lotereya bileti almaq üçün gedib. Pensiyaçı iddia edir ki, mağaza əməkdaşı onun müraciətlərinə cavab verməyib, daha sonra isə əsəbiləşərək qadını öz aldığı məhsulları “oğurlamaqda” ittiham edib.

Seymur bildirib ki, mübahisə böyüyəndən sonra onu mağazadan çıxarıblar.

Bir neçə gün sonra qadına məktub göndərilərək ölkə üzrə fəaliyyət göstərən bütün “Sainsbury’s” supermarketlərinə girişinin qadağan olunduğu bildirilib. Şirkət qərarın əvvəllər yaşandığı deyilən bir neçə insidentlə bağlı verildiyini açıqlasa da, Seymur bu iddiaları qəti şəkildə rədd edib.

Dörd nəvəsi və iki nəticəsi olan pensiyaçı baş verənlərdən sonra özünü alçaldılmış hiss etdiyini deyib. Onun sözlərinə görə, əvvəllər hər həftə həmin mağazada alış-veriş edir və 80-100 funt sterlinq xərcləyirdi.

Qadağadan sonra qadın alış-veriş etmək üçün rəqib mağazaya getmək üçün təxminən 30 dəqiqə piyada yol qət edir.

Rita Seymur qərardan şikayət edəcəyini və nüfuzunun ləkələnməsinə imkan verməyəcəyini bildirib.

Adəm