Məktəb direktoru müəllimin döyülməsindən DANIŞDI - YENİLƏNİB

Məktəbin direktoru Akifə Səmədova Publika.az-a bildirib ki, hadisə saytlarda yazıldığı kimi olmayıb. Müəllim şagirdə qarşı əxlaqsız hərəkət etməyib.

“Məktəbin fizika müəllimi Akif Səmədov 8-ci sinif şagirdini vurub. Valideyn də bundan qəzəblənib və belə bir şayiə yayıb. Şagirdin vurmasına səbəb sinifdə qızların çox gülməsi olub. Şagirdlər dərsi pozduqlarına görə müəllim belə bir hərəkət edib”.

Direktor bildirib ki, barışıq üçün valideynin evinə gedirlər: “Valideyn əsəbləşib belə xəbər yayıb. O, dünən axşam mənə müraciət etmişdi. Mən də məsələni araşdıracağımı demişdim. Lakin bu gün səhər valideyn bu məlumatı yayıb. Artıq o, bu hərəkətindən peşman olub. Biz də barışıq əldə etmək üçün valideynin evinə gedirik. Akif Səmədov mənim həyat yoldaşımdır, lakin onun direktor müavini olması yanlış məlumatdır. Məktəbin direktor müavini Bahar Mustafayevadır”.

***

Kərəm Mirzəyev adına Qubadlı rayon Xanlıq kənd 1 saylı tam orta məktəbində qalmaqal baş verib.

Publika.az Gununsesi.info-ya istinadən xəbər verir ki, bu barədə adı çəkilən təhsil ocağından məlumat verilib.

Bildirilir ki, Bakı şəhəri, Binəqədi rayonunda yerləşən məcburi köçkün məktəbinin direktor müavini Akif Səmədov yuxarı sinif şagirdləri olan qızlara qarşı əxlaqsız hərəkətlər edib. Dünən baş verən hadisəni qızlardan biri öz valideyinlərinə danışıb. Nəticədə, həmin uşağın valideyini bu gün adıçəkilən məktəbdə direktor müavini işləyən Akif Səmədovu döyüb. Hal-hazırda Akif Səmədov xəstəxanaya yerləşdirilib. Direktor müavininə ağır xəsarət yetirildiyi bildirilir.

Məktəbin direktoru isə Akif Səmədovun həyat yoldaşı Akifə Səmədovadır.

Valideyinlər onu da bildiriblər ki, ər-arvadın rəhbərlik etdiyi məktəb həm də ən çox rüşvət halları olan məktəblər kimi tanınır.

Hadisə ilə bağlı Binəqədi rayon polis idarəsində araşdırmalar aparılır.

Gülxar