Bakıda ev yandı, sahibi son anda xilas edildi - FOTO

Bakının Bülbülə qəsəbəsindəki fərdi yaşayış evlərindən birində baş verən yanğın faciə ilə nəticələnə bilərdi. Amma vaxtında edilən müdaxilə bunun qarşısını alıb.

Musavat.com-un məlumatına görə Səttar Bəhlülzadə küçəsi 48 ünvanında yaşayan Aleksandr Çıplinkovun mənzilində başlayan yanğın qısa müddət ərzində yaşayış sahəsini bürüyüb. Ev sahibinin sözlərinə görə, o, hadizə zamanı bayırda olub. Tüstülənməni görəndə Aleksandr evə qaçsa da, artıq iş işdən keçmiş olub.

Tüfeyli həyat tərzi keçirən Aleksand Çıplinkovun ailəsi hadisə zamanı evdə olmayıb. O, yanğının qarşısını almağa çalışdıqda isə az qala özü də canından olacaqmış. Onu yanğınsöndürənlər xilas ediblər. Alovların arasında çıxarılan Aleksandra təcili tibbi yardım briqadası ilkin yardım göstərib.

Dövlət Yanğından Mühafizə Xidmətinin Suraxanı rayon hissəsinin yanğınsöndürənləri alovun qarşısını alıblar. Yanğının qonşu evlərə keçməsinə imkan verilməyib. Lakin yanğın baş verən mənzil yaşayış üçün yararsız vəziyyətə düşüb.