İtaliyalı nazir "Formula 1" Azərbaycan Qran Prisindən danışdı

İtaliya Respublikasının xarici işlər və beynəlxalq əməkdaşlıq naziri Luici Di Maionun başçılıq etdiyi nümayəndə heyətinin Azərbaycan Respublikasının Prezidenti İlham Əliyevlə görüşündə "Formula 1" Azərbaycan Qran Prisindən bəhs edilib.

Publika.az xəbər verir ki, italiyalı nazir ölkəmizdə ilk dəfə səfərdə olduğunu və paytaxt Bakını birinci dəfə "Formula 1" Qran Prisi sayəsində gördüyünü qeyd edib.

"Bildiyiniz kimi, ilk dəfədir ölkənizdə səfərdəyəm. Sizi təbrik edirəm, ölkəniz möhtəşəmdir. Mən əsrarəngiz Bakı şəhərini yalnız "Formula 1" Qran-Prisi sayəsində görmüşdüm. Şəhər möhtəşəmdir, biz buraya avtomobillə gələndə gördük. Xüsusilə hazırkı vaxtda regionunuzda rəhbərliyiniz münasibətilə Sizi təbrik edirəm. Bildiyiniz kimi, bu il diplomatik münasibətlərimizin 30-cu ildönümüdür. Biz may ayında bu mühüm tədbiri qeyd edəcəyik", - Luici Di Maio vurğulayıb.

Qeyd edək ki, Azərbaycan artıq 6-cı ildir nüfuzlu beynəlxalq idman yarışında, dünyanın qabaqcıl ölkələri ilə bir arada təmsil olunur. Növbəti "Formula 1" Azərbaycan Qran Prisi cari ilin 10-12 iyun tarixlərində baş tutacaq.