Menecer Juninyonun transferi ilə bağlı son durumu açıqladı: Realdır, amma bilin ki...

“Bu gün üçün Juninyonun keçidi həll olunmayıb. Klublardan savayı oyunçunun nümayəndəsi ilə “Sevilya” arasında danışıqlar davam edir”.

Bu sözləri Publika.az-a açıqlamasında tanınmış futbol meneceri Tural Əsgərov “Qarabağ”ın futbolçusu Olavio Juninyonun “Sevilya”ya mümkün transfer haqda məlumat verərkən deyib. Prosesin iştirakçılarından biri olan Əsgərov danışıqlar zamanı hər hansı sürprizin yaşana biləcəyini vurğulayıb:

“Bütün məsələlərdə, detallarda, xırdalıqlarda razılıq əldə olunduqdan sonra futbolçu tibbi müayinəyə gedəcək. Görürsünüz ki, hələ tibbi müayinə mərhələsinə gəlib çıxılmayıb. Transfer hansı halda reallaşmaya bilər? Bir də görürsünüz ki, proses uzandığı zaman nəsə pozulur. Klubun bir neçə variantı ola bilər. Görürlər ki, bu məsələlər uzanır, ona görə də başqa varianta üstünlük verirlər. Oyunçu özü də görür ki, “deadline” yaxınlaşır, başqa komandanı seçir. Hər şey ola bilər. Ona görə həmişə deyirəm ki, rəsmi imzalar atılmamış “məsələ bitdi” demək qətiyyən düzgün deyil”.

"Juninyonun “Sevilya”ya transferi nə dərəcədə realdır” sualına tanınmış menecer belə cavab verdi: “Çox realdır. Deyim ki, 99% realdır, amma bilin ki, qalan 1% ehtimalın reallaşması da mümkündür. Bu gün-sabah, 2-3 günə məsələ konkretləşəcək”.

Qeyd edək ki, “Sevilya” ötən ilin son günlərindən etibarən Juninyonun transferi ilə bağlı “Qarabağ”la danışıqlar aparır. İspaniya mətbuatı klubların 4+1 milyon avro qarşılığında anlaşdığını iddia edirlər

Heybət Məmmədov