"Barselona"nın sabiq prezidenti məhkəməyə çağırıldı - Görün nədə ittiham olunur

Barselona məhkəməsi klubun sabiq prezidenti Xosep Bartomeunu ifadə verməyə çağırıb.

Publika.az xəbər verir ki, bu barədə "El Mundo" məlumat yayıb.

O, transferlər zamanı çoxmilyonluq komissiyaların ödənilməsi işi üzrə ittiham olunan qismində məhkəməyə dəvət olunub.

İstintaq hazırkı prezident Xuan Laportanın şikayətindən sonra başlayıb. Laporta sələfini transferlərdə çoxmilyonluq komissiyalar ödəməkdə və bir sıra qanunsuz əməliyyatlarda ittiham edib. Klubun zərəri 30 milyon avro olaraq qiymətləndirilir.

İşdə adı hallananlardan biri 2018-ci ilin yayında “Bordo”dan alınan, sonradan “Zenit”ə satılan Malkomun transferidir. Həmin keçid üçün müqavilə üzrə 10 milyon avro komissiya ödənildiyi bildirilir.

Laporta həmçinin Antuan Qrizmannın “Atletiko”dan keçidi zamanı 15 milyon avronun qanunsuz ödənişini də qeyd edib. O hesab edir ki, bu məbləğ “matrasçılar”ın, danışıqların oyunçunun “Atletiko” ilə müqaviləsi qüvvədə ikən aparıldığına dair sübutları məhkəməyə təqdim etməməsi üçün ödənilib.

Heybət