Dünya rekordçusu 3 illik diskvalifikasiya edildi

Qadınlar arasında marafon üzrə dünya rekordu sahibi Rut Çepngetiç dopinq qaydalarını pozduğunu etiraf etdikdən sonra 3 il müddətinə diskvalifikasiya olunub.

Publika.az xəbər verir ki, bu barədə BBC məlumat yayıb.

Keniyalı atlet iyul ayında müvəqqəti olaraq yarışlardan uzaqlaşdırılmışdı. Onun 14 martda verdiyi analizdə qadağan olunmuş maddə – hidroxlortiazid (diuretik və maskalama vasitəsi kimi istifadə olunan preparat) aşkarlanmışdı.

Buna baxmayaraq, Çepngetiçin bu testdən əvvəlki nailiyyətləri, o cümlədən 2024-cü ilin oktyabrında Çikaqoda 2 saat 9 dəqiqə 56 saniyəlik nəticə ilə vurduğu dünya rekordu qüvvədə qalacaq.

Atletikada Dürüstlük İdarəsi (AIU) əvvəlcə idmançının dörd il diskvalifikasiya olunmasını tələb etsə də, 31 yaşlı keniyalının pozuntunu etiraf etməsi səbəbindən cəza 3 ilə endirilib.

AIU eyni zamanda idmançının telefonundan əldə edilən məlumatları da araşdırır. Qurumun fikrincə, bu sübutlar onun dopinqdən “qəsdən istifadə etdiyinə dair əsaslı şübhə” yaradır. Mesajların bəziləri 2022-ci ilə aiddir.

Bundan əlavə, 28 fevralda götürülən nümunədə də hidroxlortiazidin az miqdarda izlərinə rast gəlinib.