Portuqaliya Ronaldoya görə HƏRƏKƏTƏ KEÇDİ

Portuqaliya Futbol Federasiyası (FPF) 2026-cı il Dünya Çempionatının seçmə mərhələsində İrlandiya ilə qarşılaşmada qırmızı vərəqə alan Kriştian Ronaldonun birdən çox oyundan kənarlaşdırılmasının qarşısını almaq üçün Beynəlxalq Futbol Federasiyasına (FİFA) müraciət edəcək.

Publika.az xəbər verir ki, bu barədə "Record" nəşri məlumat yayıb.

Portuqaliya tərəfi bir sıra arqumentlər hazırlayıb - oyundan əvvəlki gərgin atmosfer, Portuqaliya millisinin baş məşqçisinin Ronaldunu hakimlərə təsir göstərməkdə ittiham etməsi, rəqiblərin kobud hərəkətləri və Ronaldunun indiyədək heç vaxt meydandan qovulmaması. Əgər bu arqumentlər nəzərə alınarsa, futbolçu yalnız seçmə mərhələnin bir oyununu buraxa bilər və dünya çempionatının startında oynaya bilər.

Hadisə Dublin şəhərində İrlandiya ilə görüşün 61-ci dəqiqəsində baş verib. 40 yaşlı Ronaldo irlandiyalı müdafiəçi Daru O’Şiyə dirsəyi ilə zərbə endirib. Hakim Qlenn Nyuberq əvvəlcə sarı vərəqə göstərsə də, VAR-da epizodu izlədikdən sonra qərarını dəyişərək qırmızı vərəqə verib. Oyun irlandiyalı futbolçuların 2:0 hesablı qələbəsi ilə başa çatıb. Bu, Ronaldunun milli komanda ilə keçirdiyi 226 oyunda ilk qovulması olub.

Portuqaliya F qrupunda 10 xalla liderliyini qoruyur. Sonrakı yerlərdə Macarıstan (8 xal), İrlandiya (7 xal) və Ermənistan (3 xal) qərarlaşıb. Son turda Portuqaliya evdə Ermənistanla, İrlandiya isə səfərdə Macarıstanla qarşılaşacaq. Hər iki oyun 16 noyabrda keçiriləcək.

Hüseyn İbadlı