Qubadakı meydançadan İngiltərədə də varmış: Palçıqda oynadılar - Fotolar/Video

Böyük Britaniya sinoptikləri 2026-cı ildə ölkə ərazisində bir günün belə yağışsız keçmədiyini açıqlayıblar.

Publika.az xəbər verir ki, əlverişsiz hava şəraitini İngiltərə Kubokunun dördüncü mərhələsində üz-üzə gələn "Qrimsbi Taun" və "Vulverhempton" komandaları öz üzərində hiss edib.

Dördüncü divizion təmsilçisinin ev oyunlarını keçirdiyi stadionunun qazonu faktiki olaraq palçıq bataqlığına çevrilib. Buna baxmayaraq, futbolçular meydanın ağır şəraitindən çəkinməyərək mübarizəni davam etdiriblər.

Qarşılaşma qonaqların minimal hesablı qələbəsi ilə yekunlaşıb - 1:0. Oyunda yeganə qolu Santyaqo Bueno vurub.

Qeyd edək ki, son günlər Azərbaycan futbolunda da meydançalarla bağlı problem yaşanır. Son olaraq Premyer Liqanın 20-ci turu çərçivəsində Qubadakı Olimpiya İdman Kompleksinin stadionunun yararsız meydançasında keçirilən "İmişli" - "Qarabağ" matçı (0:1) müzakirələrə səbəb olub. Hətta Ağdam klubunun baş məşqçisi Qurban Qurbanov ot örtüyünün vəziyyətinə kəskin şəkildə etiraz edib.

Heybət