Rus model Mbappe ilə qalmaqaldan danışdı: Niyə özünü mənə yapışdırdı?

Rusiyalı model və bloqçu Oksana Samoylova məşhur futbolçu Kilian Mbappenin iştirakı ilə baş verən mübahisəli hadisəyə münasibət bildirib.

Publika.az xəbər verir ki, Samoylova Parisdəki oteldən çıxarkən “Real Madrid”in hücumçusu ilə toqquşub. Mbappe Samoylovanın yanından keçməyə çalışarkən onu itələyib.

Bu yüngül toxunuşa görə Kilian sosial mediada ispan azarkeşlərinin tənqidinə tuş gəlib.

Samoylovanın əri, reper Ciqan da onu müdafiə etmək üçün sərt ifadələr işlədib.

“İndi isə Mbappe ilə necə mübahisə etdiyimlə bağlı vəd edilmiş hekayə… Sadəcə, ora necə düşdüyümü və birdən-birə özüm üçün necə xəbərlər və problemlər yaratmağı bacardığımı bilmirəm.

Adi bir gün idi, tədbirlər arasında adi geyimlərimdə idim və otelimizin yaxınlığındakı bir kafedə şam yeməyinə getmək qərarına gəldim.Otelin fırlanan qapısına girdim… Küçədə çoxlu sayda mətbuat işçisi gördüm. Amma onlar həmişə çox olur, ona görə də əvvəlcə fərqinə varmadım.

Qapı fırlananda çölə çıxdım və onlar çox aqressiv şəkildə şəkil çəkməyə başladılar, dairə şəklində bizə yaxınlaşdılar…

Hamı “Kilian, Kilian” deyə qışqırmağa başladı (gülür). And içirəm ki, kim olduğunu belə anlamadım. Kim olduğunu yalnız ertəsi gün xəbərlərdən bildim.

Məni itələdiyini belə hiss etmədim. Çünki məni heç itələmədi, sadəcə çiynimə yüngülcə toxundu. Ertəsi gün xəbərlərdə bunun Mbappe olduğunu öyrəndim. Hamı bu hekayəni bu qədər qızışdırır. Hətta indi də bunun niyə bu qədər yayıldığını başa düşmürəm.

Yəqin ki, Mbappe olduğuna görə, guya o, əla futbolçudur və sair. Və niyə bu qədər hay-küy və səs-küy var? Bu, sadəcə təsadüf idi. Amma həm də gülməli idi – doğru zamanda doğru yerdə olmaq.

Mənim yalnız bir sualım var: niyə o, mənim fırlanan bölməmə [qapıma] girdi? Növbətisini gözləyə bilməzdi? Mən sakitcə çıxıb kənara çəkilərdim. O, çıxıb gedərdi və hər şey yaxşı olardı. Niyə özünü mənə yapışdırdı? Mənim yeganə şikayətim budur. Bu, çox gülməli bir hekayədir”, – Samoylova “Telegram” kanalındakı videoda bildirib.