Formula 1 komandalarının sponsor gəlirləri açıqlandı: Fantastik məbləğlər

2025-ci ilin yekunlarına görə, Formula 1 komandaları sponsorluq müqavilələrindən ümumilikdə 2,54 milyard dollar gəlir əldə edib.

Publika.az xəbər verir ki, bu göstərici əvvəlki mövsümlə müqayisədə 22,1% artım deməkdir. "SponsorUnited"in məlumatına görə, bu artımla çempionat gəlirlər baxımından Milli Futbol Liqasına (NFL) çox yaxınlaşıb. NFL-in ümumi gəliri 2,66 milyard dollar təşkil edir.

Komandalar arasında sponsor gəlirlərinə görə lider “Mersedes” olub. Almaniya təmsilçisinin sponsor gəlirləri 558 milyon dollar həcmində qiymətləndirilir. Onun ardınca “Ferrari”, “Red Bull” və “McLaren” kimi komandalar kommersiya baxımından ən güclü iştirakçılar sırasında yer alır.

Formula 1 üçün ən böyük gəlir mənbələrindən biri texnologiya sektoru olub. Bu sahədən 769 milyon dollar əldə edilib. Bu göstərici ötən illə müqayisədə 40,8% artım deməkdir. “Oracle”, “CrowdStrike”, “TeamViewer” və süni intellekt sahəsində fəaliyyət göstərən şirkətlər bu artımda əsas rol oynayıb.

Eyni zamanda pilotların kommersiya gücündə də ciddi artım qeydə alınıb. “Ferrari”nin pilotu Şarl Lekler sosial şəbəkələrdə 6,3 milyon yeni izləyici qazanıb, Luis Hemilton (“Ferrari”) 5 milyon artım göstərib, “McLaren” pilotu Oskar Piastri isə ən yüksək auditoriya artım tempinə sahib olub.

Analitiklərin fikrincə, pilotlar getdikcə komandalardan asılı olmayan, özləri ayrıca media platforması kimi çıxış edən və brendləri cəlb edə bilən fiqurlara çevrilirlər.

Heybət