Həbib Fələstinə açıq dəstəyinə görə bir neçə sponsorunu itirdi

37 yaşlı UFC Şöhrət Zalının üzvü və keçmiş yüngül çəki çempionu Həbib Nurməhəmmədov Fələstinə açıq dəstək verdiklərinə görə komanda yoldaşları ilə birlikdə bir neçə sponsorluq müqaviləsini itirdiklərini açıqlayıb.

Publika.az xəbər verir ki, o bu barədə Nyu-Cersidə azarkeşlərlə görüş zamanı danışıb:

“İnsanların 90 faizi bunun nə olduğunu bilir — bu, İsrailin Fələstin xalqına qarşı siyasətidir və soyqırımdır. Ən böyük məsuliyyət heç olmasa insanlara bu barədə danışmaqdır. Ola bilər ki, heç nə edə bilmirsiniz, amma sadəcə susmayın. Mən bunu idmançı kimi deyirəm. Təsəvvür edə bilərsinizmi, bununla bağlı paylaşım edirsiniz, müqavilələri, sponsorluqları itirirsiniz. Bir çox sponsor Fələstini dəstəkləyən bəzi idmançılarla işləmək istəmir. Söhbət sadəcə dəstəkdən getmir, onlar müqavilələrə xitam verirlər. Sizcə, bu mənim başıma gəlməyib? Yaxud İslam Mahaçevin və ya Usman Nurməhəmmədovun? Bizim də başımıza belə hallar gəlib. Biz də çox pul itirmişik. Amma insan həyatı ilə müqayisədə pul heç nədir”.