UEFA-dan VAR-la bağlı yeni layihə - FİFA kimi etməyəcək

Avropa Futbol Assosiasiyaları Birliyi (UEFA) Avropa futbolunda qaydaların təfsirini və VAR-ın istifadəsini standartlaşdırmağı hədəfləyən yeni bir platforma olan “Clear Line”ı təqdim edib.

Publika.az xəbər verir ki, platformada 150-dən çox mübahisəli hakim hadisəsi, videolar və izahatlar var. Qaydaların necə şərh edilməli olduğu və VAR-ın hansı vəziyyətlərdə müdaxilə etməli olduğu izah edilir. Yeni hadisələr ortaya çıxdıqca və ya əlavə aydınlaşdırma tələb olunduqca “Clear Line” müntəzəm olaraq yenilənəcək.

UEFA-nın VAR-a yanaşması FİFA-nın son Dünya Kubokunda qəbul etdiyi yanaşmadan fərqlənir. Avropa təşkilatı hesab edir ki, video köməkçi hakim hər bir mübahisəli məqamı ətraflı şəkildə nəzərdən keçirmək əvəzinə, yalnız hakimin açıq-aşkar səhvi hallarında çağırılmalıdır.

” L’Equipe” qəzeti UEFA-nın hakimlər rəhbəri Roberto Rosettinin sözlərini sitat gətirib:

“VAR oyunları idarə etmir. Bu, yalnız aşkar vəziyyətlər və açıq-aşkar səhvlər üçün lazımdır”.

Onun sözlərinə görə, UEFA VAR-ın ilkin ideyasına qayıtmaq və sistemdən “mikroskopik” pozuntuları aşkar etmək üçün istifadə etmək təcrübəsindən imtina etmək istəyir.

Publika.az