Samirə “Eurovision”da bu mahnını oxuyacaq - VİDEO

Azərbaycanı bu il “Eurovision-2021” beynəlxalq mahnı müsabiqəsində təmsil edən Samirə Əfəndinin çıxış mahnısı və ona çəkilən klipi təqdim edilib.

Publika.az xəbər verir ki, sənətçi Rotterdam səhnəsində “Mata Hari” mahnısı ilə çıxış edəcək. Mahnının müəllifləri niderlandlı Amy van der Vel, Coş Earl, Lyuk Van Birs və Toni Kornelissendir. Yeri gəlmişkən, 2020-ci il üçün də hazırlanmış “Cleopatra” mahnısının müəllifləri onlar idi. Mövzu isə eyni olaraq qalıb. Belə ki, hər iki kompozisiya tarixdə iz qoymuş qadınlardan bəhs edir.

Bəstə əslən Hindistandan olan rəqqasə, alman kəşfiyyatçı Mata Hari (Marqareta Qertruda Zelle) ilə bağlıdır. O, 50 min fransız əsgərin ölümündə təqsirli hesab edilərək 1917-ci ildə edam olunur. 41 yaşlı Mata ölümündən sonra dünyada “Fransanı məhv edən qadın” adı ilə daha da məşhurlaşır. Onun haqqında çoxlu sayda filmlər çəkilir. Həmçinin, o, dünyanın axarını dəyişən əfsanəvi kəşfiyyatçı qadın olaraq qalmaqda davam edir.

Mahnıda ənənəvi Azərbaycan alətləri – zurna və nağaranın, eləcə də Azərbaycan xalq rəqsi “Yallı”nın melodiyaları əsasında ərsəyə gəlmiş etnik motivlərdən istifadə edilib.

Klipin quruluşçu rejissor və operatoru İlya Mixaylusdur.

Şüarı “Open up!” olan müsabiqənin yarımfinal mərhələləri may ayının 18-i və 20-də, final mərhələsi isə may ayının 22-də Rotterdam (Niderland) şəhərində keçiriləcək. Azərbaycan təmsilçisi birinci yarımfinalda çıxış edəcək.