Tanınmış şairdən meyxanaçıya irad

Xəbər verdiyimiz kimi, Bakıda şadlıq saraylarının birində meyxana ustadları Ağamirzə, Mehman Əhmədli, Akif Arif, Mübariz Maştağalı biznesmenin itinə meyxana deyiblər.

Publika.az xəbər verir ki, bundan peşman olmadığını deyən meyxanaçı Ağamirzə açıqlama verərək şairlərin "Ay qoşa buynuz keçi”, "Gözləri mərcan xoruz” kimi şeirlər yazdıqlarını bildirib:

"Bizə də deyiblər itdən meyxana deyin, demişik. Bir itin də adı çəkilib, burada nə var axı? Kim nə istəyir desin”.

Onun bu sözləri tanınmış şair və pedaqoq Kəmalə Abıyevanı hiddətləndirib. Kəmalə Abıyeva bildirib ki, meyxanaçı uşaq ədəbiyyatının nə olduğunu bilmir.

"Görəsən nə deyək? Kminsə itinə meyxana deməyi ədəbiyyatdan üstün sayır. Özü də biznesmenin itinə neçəsi sifarişlə meyxana deyib. Hələ haqq da verir. Dəhşətdi. Əl çalan da çox. Bunu ədəbiyyat hesab etmirəm. Düşünürəm ki, mənfi təsiri var.

Meyxana sevənlər Əliağa Vahidi misal çəkməsin. Vahid meyxanaçı kimi tanınmır, hansı məclislərdə meyxanaya qulaq asıb, meyxana deibsə, o haqda danışmayaq. O qəzəlxandı. Onun da adını kiçiltməyin. Ən azı yaradıcılığına hörmət edin".