Moskva Vaşinqtonun ultimatumuna CAVAB VERDİ: Qızğın SİLAHLANMA BAŞLAYIR

Rusiya Federasiya Şurasının informasiya siyasəti üzrə komitəsinin başçısı Aleksey Puşkov ABŞ-ın dövlət katibi Mayk Pompeonun Orta və kiçik mənzilli raketlərin ləğvi haqqında Müqavilə üzrə Rusiyaya verdiyi ultimatumu şərh edib.

Publika.az “RİA-Novosti” agentliyinə istinadən xəbər verir ki, senator bunu ABŞ-ın xüsusi texnologiyası adlandırıb.

Puşkovun sözlərinə görə, Amerika tərəfi ultimatum irəli sürməklə müqavilənin ləğvinə görə məsuliyyəti Rusiyanın üzərinə qoymaq istəyir.

“Pompeonun ultimatumu ABŞ-ın müqavilədən çıxışının texnologiyasıdır. Vaşinqtonda anlayırlar ki, Moskva belə ultimatumu rədd edəcək. Və onda onlar bütün aləmə bildirəcəklər ki, hər şeyə görə yenə də Rusiya günahkardır və buna görə onlar müqavilənin icrasını dayandırırlar. Onlara müqavilənin icrasını dayandırmaq üçün əsaslandırma lazımdır. Pompeonun ultimatumunun mənası budur”, - senator bildirib.

Daha əvvəl ABŞ-ın dövlət katibi bildirib ki, Rusiya Orta və kiçik mənzilli raketlərin ləğvi haqqında Müqaviləni yerinə yetirməzsə, ABŞ bu razılaşma ilə bağlı olan öhdəliklərini dayandıracaq. Pompeo qeyd edib ki, Vaşinqton müqavilənin icrasına qayıdış üçün Rusiyaya 60 gün vaxt verir.

Xatırladaq ki, oktyabrın 21-də Donald Tramp Vaşinqtonun Orta və kiçik mənzilli raketlərin ləğvi haqqında Müqavilədən çıxacağını açıqladı. Onun sözlərinə görə, Rusiya qadağan edilmiş qanadlı raketləri istehsal etməyə və silahlanmaya qəbul etməyə davam edir.

Qeyd edək ki, Müqavilə Sovet İttifaqı Kommunist Partiyası Mərkəzi Komitəsinin birinci katibi Mixail Qorbaçov və ABŞ prezidenti Ronald Reyqan tərəfindən 1987-ci ildə imzalanıb. Sənəd 500 kilometrdən 5500 kilometrə qədər ballistik və qanadlı nüvə raketlərinin istehsalını, həmçinin onların sınağını qadağan edir.

Ömər Dağlı