Qazaxıstanda terakt təhlükəsi: Astanada antiterror əməliyyatı rejimi tətbiq olundu

Qazaxıstanın paytaxtında Şanxay Əməkdaşlıq Təşkilatının (ŞƏT) qarşıdan gələn sammiti ilə əlaqədar iyulun 2-dən antiterror əməliyyatı üçün hüquqi rejim tətbiq edilib.

Publika.az xəbər verir ki, bu barədə Respublika Milli Təhlükəsizlik Komitəsinin mətbuat xidməti məlumat yayıb.

İyulun 2-dən iyulun 5-dək Qazaxıstanda mühüm beynəlxalq tədbirlər, o cümlədən ŞƏT-ə üzv ölkələrin Başçıları Şurasının iclası və Çin Xalq Respublikası sədrinin dövlət səfəri keçiriləcək.

“Dövlət başçılarının və beynəlxalq təşkilatların rəhbərlərinin də daxil olduğu xarici nümayəndə heyətlərinin maksimum təhlükəsizliyini təmin etmək üçün səlahiyyətli orqanlar Astana şəhərinin ayrı-ayrı ərazilərində antiterror əməliyyatının hüquqi rejimi çərçivəsində asayişin və ictimai təhlükəsizliyin təmin edilməsi üçün tədbirlər görür”, - məlumatda deyilir.

Hüquqi rejim iyulun 2-si saat 00:01-dən qüvvəyə minib və ŞƏT-in zirvə toplantısının keçirildiyi ərazilərdə və qorunan şəxslərin marşrutlarında iyulun 4-ü saat 23:59-dək davam edəcək.

Mühafizə olunan şəxslər Akmola, Karaqanda vilayətləri və Almatıya gələrsə, bu bölgələrdə rejim tətbiq olunacaq.

Antiterror əməliyyatı zonalarında fiziki şəxslərin və nəqliyyat vasitələrinin hərəkəti məhdudlaşdırılacaq. Mühafizə olunan şəxslər üçün xüsusi marşrut xətti üzrə şəhər sərnişin daşımaları ləğv ediləcək.

Həmçinin, Astana, Almatı, Karaqanda və Kokşetauda ŞƏT-in sammiti obyektlərində antiterror əməliyyatı üçün hüquqi rejimin tətbiqi ilə əlaqədar həmin dövr üçün terror təhlükəsinin orta (sarı) səviyyəsi müəyyən edilir.

Bu, nəqliyyat vasitələrinin və piyadaların hərəkətinə bir sıra məhdudiyyətlərin tətbiqini, eləcə də hava limanlarında və qatar stansiyalarında təhlükəsizlik tədbirlərinin gücləndirilməsini nəzərdə tutur.

Akqabay