Turistlər və yerli əhali Türkiyədən qaçır - Çünki...

Türkiyənin məşhur kurortları turistləri itirməyə başlayıb. Hətta ölkə vətəndaşları da qiymətlərin yüksək olması səbəbindən tətil üçün daha çox xarici ölkələrə üstünlük verirlər.

Publika.az xəbər verir ki, bu barədə yerli "Alanya Medya" nəşri yazır.

Türklər ilk növbədə hər şey daxil tətilin daha ucuz olduğu Misir Şarm əl-Şeyxinə baxmağa başlayıblar. Nəşrin məlumatına görə, orada yerli istirahət mərkəzlərindən daha çox bilet satılır.

Biznes üçün əsas problem türk lirəsinin ucuzlaşmasının davam etməsi və ötən ay 75,45 faizə çatan inflyasiyanın sürətlənməsidir ki, bu da son bir il yarımın ən yüksək göstəricisidir. Aylıq ifadədə inflyasiya 3,37 faiz təşkil edib. Türkiyə valyutası 1 dollar üçün 33,06 lirəyə kimi aşağı düşüb. Bunun fonunda Mərkəzi Bank yenə də uçot dərəcəsini artırmağa cəsarət etməyib.

Qeyd olunur ki, inflyasiya gözləntiləri və geosiyasi risklər qiymət artımını dəstəkləməyə davam etsə də, daxili tələbat yavaşlayır. Mərkəzi Bankın rəhbəri Fatih Karahan 500 və 1000 lirəlik əskinasların dövriyyəyə buraxılmasını istisna etməyib.

Adəm Abbaslı