Gecənin ulduzu: “Heç vaxt het-trik etməmişdim” - MÜSAHİBƏ

“Qəbələ”nin yeni transferi, “Samtredia” ilə oyunda vurduğu 3 qolla komandasının qələbəsində böyük pay sahibi olan Teo Uiks gecənin qəhrəmanı oldu. Oyundan sonra miks-zonada hər kəs onu gözləyirdi. ilk oyundakı təəssüratlarını öyrənmək üçün...

Publika.az Uiksin mini müsahibəsini təqdim edir:

- 5:1 hesablı qələbəni necə şərh edərdin?

- Avroliqadakı ilk oyunumuz idi. Matçın çətin keçəcəyini düşünürdük. 90 dəqiqə ərzində yaxşı oynadıq. Böyükhesbalı qələbə cavab görüşü öncəsi işimizi bir qədər asanlaşdırdı. Ümimi götürdükdə, yaxşı oynadığımızı söyləyə bilərəm.

- 3 qol vurmaqla “Qəbələ”nin qələbəsində böyük pay sahibi oldun. Matçdan öncə het-trik edəcəyin heç ağlına gələrdi?

- Oyundan əvvəl 3 qol vuracağımızı gözləmirdim. Çünki karyeramda heç vaxt het-trik etməmişdim. Bu, ilkdir. Özümü göstərmək üçün şans yaranmışdı. Bacardığım qədər fürsətdən yararlanmağa çalışdım.

- Rəqibin çıxışını necə dəyərləndirərdin?

- “Samtredia” zəif deyil. Sadəcə, bu gün meydanda diqtə edən tərəf biz idik. Həm müdafiədə, həm də hücumda daha fəal, daha üstün idik. Bunun da sayəsində qələbə qazandıq.

- Amma “Qəbələ” oyundan əvvəl də favorit hesab olunurdu...

- Heç vaxt rəqibi zəif adlandırmaq olmaz. Hər komandanın potensialı var. Bizim güclü futbolçularımız var və bu gün rəqibdən daha yaxşı oynadıq.