• USD 1,7000 0,00% EUR 1,8991 0,00%
    • GBP 2,2877 0,00% RUB 0,0271 0,00%

“O, məni buna məcbur etdi” - Aparıcı məşhur baldızından elə sözlər dedi ki...

“O, məni buna məcbur etdi” - Aparıcı məşhur baldızından elə sözlər dedi ki...

Yeni mövsümdə Xəzər Televiziyası yeni simaları ilə də diqqət çəkəcək. Bəzi aparıcılarla sağollaşan telekanalda yeni simalar fəaliyyətə başlayıb. Onlardan biri də “Xəzər maqazin” verilişinin aparıcısı Çinarə Cəlilovadır.

Publika.az-a müsahibə verən Çinarə teleməkanda ondan hündürboy xanım aparıcı olmadığını da deyib.


- Bildiyimiz qədər ilk dəfədir ki, özünü aparıcı kimi sınayırsan. Bu necə oldu?

- Bəli bu, mənim ilk təcrübəmdir. Bundan öncə filmlərə, seriallara təkliflər alırdım, amma Xəzər TV-dən gələn təklif məni daha çox sevindirdi və razılaşdıq. İlk dəfə belə bir teleməkanda çalışacağım üçün özümü çox şanslı hesab edirəm.

- İlk dəfə səni aparıcı kimi kim kəşf elədi?

- Baldızım. Mən onların evinə gəlin gedən gündən baldızım, həm də həmkarım Fira Cəlilova məni aparıcı kimi gördüyünü deyirdi. Həmişə bildirirdi ki, sənin siman mütləq tanınmalıdır. Beləcə baldızım məni buna məcbur elədi, seçimlərə qatıldım.

- Səncə, nəylə diqqət çəkdin və səni seçdilər?

- Məncə, ümumi görünüşümü çox bəyəndilər. Üz cizgilərim, hündürboy və arıq olmağım. Əvvəl fotolarımı göndərdim, bəyəndilər, sonra özümü dəvət etdilər. Seçimə yüz qız qatılıbmış, amma yüz xanımın içində məni seçdilər. Efir məkanında ən ucaboy xanım aparıcı mənəm.

- Çox özünü tərifləyirsən, boy ölçün neçədir ki?

- 1.80.

- Boyunu bildik, indi də qabiliyyətindən danış. Digər maqazin proqramlarından nəylə fərqlənəcəksən?
- Bizim proqramımız digər maqazin verilişlərindən həqiqətən çox fərqlənəcək. Çünki arxamızda çox böyük və güclü komanda var. İçi mən qarışıq hamı öz işini böyük həvəslə görür. Hələ proqram efirə getməmiş hamı verilişin anonsundan danışır. Hamıdan müsbət rəylər aldım. Anonsumuzda da dediyim kimi hər parlayanı deyil, əsl ulduzları göstərəcəyik.

- Məqsəd və hədəfini açıqlaya bilərsən?
- Məqsədim Xəzər TV-nin mənə göstərdiyi etimadı doğrultmaqdır. Hədəfim isə heç vaxt kiçik olmayıb. Yalnız Azərbaycanda yox bütün dünyada tanınmış sima olmaq istəyirəm.

- Səncə, şarmın nədədir?
- Onu yəqin ki gələcəkdə izləyicilər tapar. Amma sizə bir söz deyim, elə xanım var, gözəldir, amma çəkici deyil, mənsə deyilənə görə şirinəm.

- Həmişə şirin olmaq da ürəyi vurur ha!
- Razıyam. Hərdən acı dil də olmaq lazımdır.

- Baldızınla eyni telekanalda çalışırsan? Münasibətiniz necədir, sənə baldızlıq edir?
- Bəli, eyni telekanalda çalışırıq. Fira çox ürəyi təmiz qızdır. Baldızım olduğuna görə demirəm, həqiqətən elədir. Hələ heç kim deyə bilməz ki, Fira kiməsə pislik edib. Bizim aramızda isə baldız-gəlin münasibəti olmayıb. Həmişə rəfiqə və bacı kimi davranmışıq bir birimizlə.

- Yaxşı az təriflə, baldızım məni də qabağa çəksəydi, mən də tərif söyləməkdə sənin kimi dili qəfəsə qoymazdım. Ailəndən danış görək, həyat yoldaşın seçiminə mane olmadı ki?
- Həyat yoldaşım həmişə seçimlərimə hörmətlə yanaşıb. Özü də çox müasir və anlayışlı insandır. Bir-birimizin istək-arzularını çox yaxşı başa düşürük və dəstək oluruq. Həm də teleməkanda tək ailəli aparıcı mən deyiləm ki… Aparıcıların demək olar ki, əksəriyyəti ailəlidir, uşaqları var. Xəzər TV özü də ailə kanalıdır.

- Həyat yoldaşının qısqanclığını bəri başdan gözə almısan?
- Əlbəttə. Qısqanclıq hər kişidə olur. Elə mən özüm də qısqanc biriyəm. Onun da işində elə hallar olur ki, mən qısqanım. Amma hər şeydən öncə bizim aramızda çox böyük güvən hissi var. Ona görə mənasız qısqanclıqlarla günümüzü korlamırıq.

- Hansısa müğənnilərə qadağalar olmayacaq ki, yoxsa, qapınız bütün sənətçilərə açıq olacaq?
- Bu haqda hələ ki məlumatım yoxdur.

- Xoşlamadığın müğənnilər var?
- Hər kəsin sənətinə hörmət edirəm. Xoşlamadığım deməyim, dinləmədiyim müğənnilər var.

- Bir qadın kimi ən çox hansı qabiliyyətinlə öyünürsən?
- Qadın hər şeyi bacarmalı, bilməlidir. İş həyatında da, evdə də. Hərdən yeni insanlarla tanış olanda mənə deyirlər ki, heç təsəvvür edə bilmirik sən ev işləri görüb yemək bişirəsən. Amma bütün yeməklərdən hazırlaya bilirəm. Üstəlik həm ev, körpə uşaq həm də işi bir vaxta sığdıra bildiyim üçün özümü güclü hesab edirəm.

- Özünü dəbi diktə edən xanım sayırsan?
- Mən həm də bir qadın jurnalında dəb yazarı olaraq çalışırdım. Bu işi hobbi olaraq görürdüm və böyük həvəslə izləyirdim dəbi. Elə indi də vaxt tapdıqca izləməyə çalışıram. Zövqlü geyinib keçinməyi də çox sevirəm.

- Hansı aparıcını özünə rəqib görürsən?
- Özümə rəqib olaraq aparıcı seçsəm, bu yəqin ki türk maqazin proqramlarından olar. Onları həqiqətən çox bəyənirəm hətta çox vaxt paxıllığım da tutur.

- Kilo almamaq üçün neynirsən?
- Vaxt tapan kimi idmana gedirəm və çalışıram ki çox yağlı, duzlu yeməklər yeməyim.

- Əksər xanımların qorxusu kökəlməyi ilə bağlıdır, bəs sənin fobiyaların varmı?
- Məncə, hər şey insanın öz əlindədir. Kökəlmək də, arıqlamaq da. Sadəcə, çətinlikdən qorxmamaq lazımdır. Mənim isə xüsusi bir fobiyam yoxdur.

- Özündə bəyənmədiyin xüsusiyyət hansıdır?
- Buğa bürcü olduğum üçün hərdən inadcıl, tərs oluram. Onu düzəltməyə çalışıram.

- Bəs başqalarının hansı xüsusiyyəti səni əsəbiləşdirir?
- Hər şeyi bildiklərini zənn edən, özündən razı və digər insanlara yuxarıdan aşağı baxan insanlar məni əsəbləşdirir. Elə insanlardan uzaq oluram.

- Sözü üzə deyənsən?
- Sözü üzə vaxtında deməyi sevirəm. Elə şeylər olur ki, onları düzgün zamanda demək lazımdır. Yersiz olaraq həmin an desən, qarşıdakı başa düşməyəcək və sən pis olacaqsan. Ona görə də çox vaxt düzgün zamanı gözləyirəm.

- İnsanlarla baryer saxlamağı xoşlayırsan?
- Əgər qarşımdakı insanda mənfi aura duyuramsa, onunla baryer saxlayıram. Elə də olub ki, ilk dəfə tanış olduğum səmimi biri ilə saatlarla söhbət etmişəm.

- Sevimli məşğuliyyətin varmı?
- Çoxdur. İncəsənəti çox sevirəm. Rəsm, fortepiano kurslarına getmişəm. Boş vaxt tapanda bunlarla məşğul oluram.

Cəvahir

Xəbər lenti

DAHA ÇOX XƏBƏR