Ukraynanın yük təyyarəsi İsraildə - ABŞ hərbi texnikası bu ölkəyə daşınır

Ukraynanın "An-124" ağır nəqliyyat təyyarəsi İsrailin Ben Qurion hava limanına gəlib, burada Amerika hərbi yük avtomobilləri və avadanlıqları ilə yüklənib və bundan sonra Birləşmiş Ərəb Əmirliklərinə geri uçub.

Publika.az xəbər verir ki, bu barədə İsrailin dövlət teleradio şirkəti olan "Kan" məlumat yayıb.

Uçuş qeydlərinə görə, təyyarə İsrailə Birləşmiş Ərəb Əmirliklərindən gəlib. "Oşkoş" yük maşınları da daxil olmaqla hərbi texnika yükləndikdən sonra Gürcüstanda dayanaraq BƏƏ-yə qayıdıb.

Bu, ilk dəfə deyil ki, Ukraynanın "An-124" təyyarəsi İsrailə uçuşlar üçün istifadə olunur. Oktyabrın əvvəlində təyyarə Ben-Qurion Beynəlxalq Hava Limanında görünüb. KİV-in məlumatına görə, ona "Patriot" ələ keçirən raketlərin daşınması üçün istifadə edilən konteynerlərə bənzər konteynerlər yüklənib.

Ukraynanın "Kyiv Post" nəşri o zaman hava hücumundan müdafiə sisteminin komponentlərinin mümkün daşınması barədə məlumat yayıb, lakin bu məlumatın rəsmi təsdiqi olmayıb.

Hüseyn İbadlı