ABŞ və İran arasında müharibə dayanır - DETALLAR

Xəbər verdiyimiz kimi, ABŞ və İran arasında gərginliyi müvəqqəti dayandıran atəşkəs rejiminin müddəti uzadıla bilər.

Publika.az xəbər verir ki, bu barədə "Associated Press" agentliyi öz mənbələrinə istinadən məlumat yayıb.

Bildirilir ki, aprelin 22-də başa çatacaq iki həftəlik atəşkəsin müddətini uzatmaq barədə "prinsipial razılıq" əldə edilib. Bu addımın atılmasında əsas məqsəd diplomatik danışıqların davam etdirilməsi üçün əlavə vaxt qazanmaqdır.

Agentliyin həmsöhbətlərindən biri qeyd edib ki, vasitəçilər hazırda üç əsas mübahisəli məsələ üzərində kompromis variantlar hazırlayırlar: İranın nüvə proqramı, Hörmüz boğazındakı vəziyyət, hərbi əməliyyatlar zamanı İrana dəymiş ziyana görə təzminatın ödənilməsi.

Xatırladaq ki, bundan əvvəl ABŞ prezidenti Donald Tramp İranla münaqişənin sona yaxınlaşdığını bəyan etmişdi. O, həmçinin aprelin sonunda Britaniya kral ailəsinin ABŞ-a nəzərdə tutulan səfərinə qədər böyük sazişin imzalana biləcəyini istisna etməyib.

Müəllif: Adəm