"Hizbullah"ın gizli maliyyə imperiyası - Qərb kəşfiyyatı şok rəqəmləri AÇIQLADI

Livanın "Hizbullah" hərəkatı silah alışı, döyüşçü ailələrinə dəstək və digər ehtiyaclar daxil olmaqla hər ay təxminən 50 milyon dollar vəsait xərcləyir.

Publika.az xəbər verir ki, bu barədə "Euractiv" nəşri Qərb kəşfiyyatının hesabatına istinadla məlumat yayıb.

Sənəddə hərəkatın maliyyələşmə strukturu və bu prosesə cəlb olunmuş əsas şəxslər təsvir edilir. Analitiklər iddia edirlər ki, "Hizbullah"ın cari ehtiyaclarını ödəmək üçün böyük maliyyə axını tələb olunur. Vəsaitlər yalnız təşkilat üzvlərinə ödənişlərə və silah tədarükünə deyil, həmçinin yaralanmış və ya məhv edilmiş hərbçi ailələrini dəstəkləyən sosial proqramların yaradılmasına yönəldilir. Əsas maliyyə mənbəyi İran hesab olunsa da, təşkilat həmçinin Livandakı və xaricdəki bəzi tərəfdarlarından, eləcə də yerli sponsorlardan vəsait əldə edir. Onların arasında "Al-Amana" yanacaq şirkəti və "Jood" qızıl hasilatı firmasının adları çəkilir.

Bundan əlavə, "Euractiv" livanlı iş adamı Məhəmməd Nurəddini hərəkatın əsas maliyyəçilərindən biri kimi qeyd edir. Hesabatda həmçinin Livan və Dubayda qızıl hasilatı müəssisələrini idarə edən Həsən K. adlı digər maliyyə mənbəyi də xatırlanır.

Hüseyn İbadlı