Səudiyyə Ərəbistanı bu ölkələr üçün neft qiymətlərini endirdi

Səudiyyə Ərəbistanının milli neft şirkəti “Saudi Aramco” may ayındakı kəskin artımdan sonra iyun ayı üçün Asiya ölkələrinə tədarük edilən neftin qiymətlərini aşağı salıb.

Publika.az xəbər verir ki, bu barədə “Bloomberg” agentliyi şirkətin məlumatlarına istinadla məlumat yayıb.

Mövcud məlumatlara görə, “Arab Light” markalı neftin Asiya müştəriləri üçün qiyməti bir barel üçün 4 dollar azaldılıb. Bununla belə, bazar iştirakçıları daha ciddi azalma — təxminən bir barel üçün 8 dollar eniş gözləyirdilər.

Daha əvvəl dünya neft ehtiyatlarının son səkkiz ilin ən aşağı səviyyəsinə yaxınlaşdığı barədə məlumat verilmişdi. “Goldman Sachs”ın analitikləri bu barədə xəbərdarlıq ediblər. Ekspertlərin fikrincə, rezervlərin tükənmə sürəti narahatlıq doğurur, çünki Hörmüz boğazı vasitəsilə tədarüklər məhdud olaraq qalır. Bankın qiymətləndirmələrinə görə, ümumi dünya neft ehtiyatları qlobal tələbatın 101 gününü ödəyə biləcək səviyyədədir və may ayının sonuna qədər bu göstərici 98 günə qədər azala bilər.

Hüseyn İbadlı