İsrail Trampın planlarından narahatdır

İsrail hökumətində Ağ evin rəhbəri Donald Trampın İrana qarşı hücumların bərpası ilə bağlı ehtimal olunan qərarı fonunda son dərəcə gərgin atmosfer hökm sürür.

Publika.az xəbər verir ki, bu barədə İsrail rəsmisinə istinadla N12 telekanalı məlumat yayıb.

Məlumata görə, Təl-Əvivdə hesab edirlər ki, ABŞ Prezidenti hazırda İrana genişmiqyaslı zərbə endirməyə indiyədək olduğundan daha yaxındır və danışıqları “vaxt uzatma” kimi qiymətləndirir. Yüksəkvəzifəli rəsmilərin fikrincə, Tramp hələlik zərbələrin miqyasının necə olacağı barədə yekun qərar verməyib.

Mənbənin sözlərinə görə, gərginlik pik həddə çatıb. O vurğulayıb ki, Trampa təqdim olunan ssenari İranın enerji infrastrukturuna nöqtəvi zərbələrin endirilməsi ehtimalını nəzərdə tutur. Belə bir addım yəhudi dövlətində vəziyyəti sabitlikdən çıxara bilər.

Bundan əvvəl İslam İnqilabı Keşikçiləri Korpusunun İordaniyada daha üç ABŞ qırıcısını məhv etdiyi barədə məlumat verilmişdi. Bildirilirdi ki, zərbə avqustun 1-i səhər saatlarında ballistik raketlərlə endirilib.

Xatırladaq ki, ABŞ Prezidenti Tehranla razılaşma naminə İrana qarşı planlaşdırılan güclü zərbəni ləğv etməyə razılıq verdiyini bəyan edib.

Hüseyn İbadlı