İran Trampa meydan oxudu: Güzəşt zəiflik kimi qəbul olunur

İran rəhbərliyi hesab edir ki, ABŞ ilə münasibətlərdə indiyədək nümayiş etdirilən çeviklik gözlənilən nəticəni verməyib, əksinə, Tehranın danışıqlardakı mövqeyini zəiflədib.

Publika.az xəbər verir ki, bu barədə "Reuters" yüksəkvəzifəli İran rəsmisinə istinadən məlumat yayıb.

Mənbənin sözlərinə görə, əvvəlki güzəştlər Vaşinqtonun təzyiqlərini daha da artırıb. Bu isə Tehranda belə bir qənaət formalaşdırıb ki, məzmunlu danışıqlara başlamazdan əvvəl İranın əlində təsir rıçaqları olmalıdır.

İran rəhbərliyi hesab edir ki, ABŞ prezidenti Donald Tramp güzəştləri zəiflik əlaməti kimi qiymətləndirir və buna cavab olaraq təzyiq siyasətini gücləndirir. Buna görə də Tehran Vaşinqtonla yalnız bərabər şərtlərlə dialoq aparmağa imkan verəcək təsir vasitələri formalaşdırıldıqdan sonra irəliləyişin mümkün olacağına inanır.

Xatırladaq ki, daha əvvəl İranın ABŞ-ın Hörmüz boğazının açılması ilə bağlı son təklifini qəbul etməkdən imtina etdiyi bildirilmişdi.

Müəllif: Adəm Abbaslı