İran Hörmüz boğazında üstünlük qazanır - ABŞ-ı narahat edən razılaşma

İran və Oman Hörmüz boğazında gəmiçiliyin bərpasına dair razılaşma istiqamətində mühüm irəliləyiş əldə ediblər.

Publika.az "Associated Press" agentliyinə istinadən xəbər verir ki, bu razılaşma Yaxın Şərqdə müharibənin dayandırılması yolunda dönüş nöqtəsi ola bilər.

Məlumata əsasən, hazırlanan plana görə, gəmilər Fars körfəzinə İranın nəzarət etdiyi marşrutla daxil olacaq, çıxış isə Omanın nəzarətində olan dəhliz vasitəsilə həyata keçiriləcək. Bundan əlavə, təhlükəsizlik və dəniz mühitinin qorunması üçün xüsusi rüsumların tətbiqi nəzərdə tutulur.

Bildirilib ki, danışıqlar hələ yekunlaşmayıb və razılaşmanın son variantı dəyişə bilər. Eyni zamanda, mümkün saziş ABŞ-ın İran limanlarına tətbiq etdiyi blokadanın ləğvi ilə əlaqələndirilir.

Ekspertlər hesab edirlər ki, Hörmüz boğazı üzərində İranın nəzarətinin rəsmiləşdirilməsi Tehran üçün mühüm strateji uğur olacaq. Bu səbəbdən Vaşinqtonun blokadanı aradan qaldırmaqdan imtina edərək razılaşmanın qarşısını almağa çalışacağı istisna edilmir.

ABŞ rəsmisi isə bildirib ki, Vaşinqton tərəflərdən heç birinin gəmi marşrutlarına və tranzit imkanlarına nəzarət etmədiyi əvvəlki vəziyyətin bərpa olunmasının tərəfdarıdır.

Müəllif: Adəm