ABŞ strateji müttəfiqindən neft idxalını SIFIRA ENDİRDİ

Səudiyyə Ərəbistanından ABŞ-a neft idxalı iyul ayında sıfıra enib.

Publika.az xəbər verir ki, bu barədə "Bloomberg" yazır.

Agentliyin məlumatına görə, bu, 1985-ci ildən bəri tədarükün tam bir ay müddətinə dayandırıldığı ilk haldır. Hələ cari ilin aprel ayında Vaşinqton Ər-Riyaddan gündə 600 min barrel-dən çox neft alırdı.

Hörmüz boğazında gəmiçiliyin pozulması ilə əlaqədar yaranan vəziyyətə görə Amerika neft emalı zavodları Səudiyyə tədarüklərinə əvəz axtarmağa başlayıblar.

Bu yaxınlarda Səudiyyə Ərəbistanının vəliəhd şahzadəsi Məhəmməd bin Salman Birləşmiş Ştatların Prezidenti Donald Trampdan İrana zərbələri dayandırmağı xahiş edib. "Axios" portalının məlumatına görə, bin Salman Ağ Evin rəhbəri ilə telefon danışığı zamanı onun İrana qarşı irimiqyaslı zərbələr endirmək niyyətindən narahatlığını ifadə edib. O, Amerika liderini Vaşinqtonun fəaliyyət planına aydınlıq gətirməyə çağırıb.

Öz növbəsində, Səudiyyə Ərəbistanının "Al Arabiya" telekanalı ABŞ və İran arasında vasitəçilər vasitəsilə həyata keçirilən məsləhətləşmələrin son mərhələyə keçdiyini bildirib.

Xatırladaq ki, onilliklər ərzində "təhlükəsizlik müqabilində neft" prinsipinə əsaslanan ABŞ və Səudiyyə Ərəbistanı Yaxın Şərqdə əsas strateji müttəfiqlər hesab olunurlar, lakin son illərdə regional siyasət və enerji bazarı ilə bağlı bəzi məsələlərdə tərəflər arasında müəyyən fikir ayrılıqları da müşahidə edilir.

Hüseyn İbadlı