İsrail Qəzzaya görə həyəcan siqnalı verdi: Ordu “ən pis ssenariyə” hazırlaşır

İsrailin müdafiə naziri İsrael Katz Qəzza zolağında yerləşən ordu bölmələrinin hazırlıq səviyyəsinin artırılması barədə göstəriş verib. Qərar HƏMAS-ın 2023-cü il oktyabrın 7-də İsrailə hücumunun ildönümü ərəfəsində qəbul edilib.

Publika.az xəbər verir ki, bu barədə “The Times of Israel” yazıb.

Katz bildirib ki, İsrail qüvvələrinə qarşı hər hansı təxribat baş verərsə, buna sərt cavab veriləcək. Onun sözlərinə görə, İsrailin kəşfiyyat məlumatları HƏMAS-ın məhz oktyabrın 7-də Qəzzadakı İsrail hərbçilərinə hücum etməyə cəhd göstərə biləcəyinə işarə edir.

Nazir orduya bütün mümkün ssenariləri hesablayaraq hazırlıq səviyyəsini yüksəltmək tapşırığı verib. O, İsrail hərbçilərinin zərər görəcəyi təqdirdə bunun məsuliyyətinin HƏMAS-ın və Qəzza sakinlərinin üzərinə düşəcəyini, ağır bədəl ödəyəcəklərini deyib.

Bununla yanaşı, İsrail Qəzza zolağı ilə sərhəddəki bütün keçid məntəqələrini bağlayıb. İordan çayının qərb sahilində də oktyabrın 5-dən 7-dək tam məhdudiyyət rejimi tətbiq edilir. Bu barədə İsrail hökumətinin Fələstin ərazilərindəki fəaliyyətinin əlaqələndirilməsi idarəsi (COGAT) məlumat yayıb.

Qeyd edək ki, HƏMAS 2023-cü il oktyabrın 7-də İsrailə hücum edib. Hücum nəticəsində təxminən 1200 nəfər ölüb, 251 nəfər girov götürülüb. İsrail buna cavab olaraq Qəzzada hərbi əməliyyata başlayıb.

Müəllif: Adəm