İran böhranı Avropanı silkələdi: 100 milyardlarla əlavə xərc, qaz ehtiyatları tükənir

İran ətrafında hərbi gərginliyin artması Avropada enerji qiymətlərini kəskin yüksəldib. Avropa İttifaqı (Aİ) böhranın qarşısını almaq üçün effektiv vasitələrin çatışmazlığı ilə üzləşib. Enerji xərclərinin artması və qaz ehtiyatlarının azalması Avropanın vəziyyətini daha da çətinləşdirir.

Publika.az xəbər verir ki, bu barədə “Bloomberg” agentliyi məlumat yayıb.

Bildirilir ki, Fars körfəzindəki böhran neft və qaz qiymətlərinin sıçrayışına səbəb olub. Nəticədə Avropanın qalıq yanacaq idxalına çəkdiyi xərclər 100 milyard avrodan çox artıb, inflyasiya sürətlənib. Bütün bunlar istilik mövsümü ərəfəsində Avropanın qaz anbarlarındakı ehtiyatların rekord aşağı səviyyəyə düşməsi ilə eyni vaxta təsadüf edib.

Brüsseldəki mənbələrin məlumatına görə, Avropa Komissiyası dövlət və hökumət başçılarına böhranın həlli üçün universal vasitənin olmadığını bildirəcək. Qiymətlərin məhdudlaşdırılması və vergi güzəştləri kimi ənənəvi dəstək tədbirləri isə dövlət borcunun artdığı və faiz dərəcələrinin yüksək olduğu şəraitdə milli büdcələr üçün ağır yük yaradır.

Böhrana qarşı tədbirlər çərçivəsində Aİ enerji resurslarının birgə satın alınması mexanizmini uzatmağı, metanla bağlı ekoloji tələblərin tətbiqini təxirə salmağı və sənayeyə dövlət subsidiyalarını davam etdirməyi nəzərdən keçirir. Lakin ekspertlər hesab edirlər ki, regionun enerji idxalından yüksək asılılığı səbəbindən bu addımlar qısa müddətdə xammalın qiymətini aşağı sala bilməyəcək.

Avropa İslahatları Mərkəzinin elmi əməkdaşı Eliz Viadere bildirib ki, Aİ liderləri dörd il ərzində ikinci enerji şoku ilə üzləşiblər. Onun sözlərinə görə, bu dəfə vəziyyəti dövlət borcunun və borclanma xərclərinin artması daha da çətinləşdirir.

Müəllif: Adəm