Mübariz Qurbanlı: Yas qadağası Azərbaycanda yaşayan xristian və yəhudilərə də qoyulub

“Yas mərasimlərində israfçılığın aradan qaldırılması yalnız islam toplumuna şamil edilmir. Bu, bütövlükdə, cəmiyyətimizdəki digər dini icmalara da aid olan məsələdir. Xristianlar, yəhudilər və digər dinlərin nümayəndələrinin də bu tövsiyələrə əməl etmələri məqsədəuyğundur”.

Publika.az xəbər verir ki, bunu Yeni Azərbaycan Partiyasının (YAP) saytına müsahibəsində Dini Qurumlarla İş Üzrə Dövlət Komitəsinin sədri Mübariz Qurbanlı deyib.

Komitə sədri bildirib ki, görülən işlər artıq öz bəhrəsini verib və yas mərasimlərində israfçılıq, demək olar ki, aradan qalxır. Təşəbbüslər və tövsiyələr irəli sürüldükdən sonra bu sahədə xeyli dəyişikliklər müşahidə olunmaqdadır:

“Əgər bu gün monitorinq aparsaq, əksər bölgələrimizdə yas mərasimlərində israfçılığın aradan qaldırıldığını görə bilərik. Bir məsələni də xüsusi qeyd edim ki, bu tövsiyələr əksəriyyət tərəfindən qəbul edilib. Bizim komitəyə gələn məktublar, KİV-də, sosial şəbəkələrdə gedən diskussiyalar bir daha onu göstərir ki, vətəndaşların böyük əksəriyyəti yas mərasimlərində ifrat israfçılığın əleyhinədir”.

Komitə sədri qeyd edib ki, yerlərdə yas mərasimlərində ifrat israfçılığın aradan qaldırılması yönündə vətəndaşlar özləri addımlar atırlar. Burada hər hansı məcburilikdən söhbət gedə bilməz: “Bu gün Azərbaycanda, xüsusilə dini maarifləndirmə istiqamətində aparılan işlər demək olar ki, hər yerdə getməkdədir. Bu yöndə mətbuatda dəyərli yazılara rast gəlirik. Bu məsələdə əsas diqqət vətəndaşların öz istək və arzuları nəzərə alınmaqla addımların atılmasına yönəlib”.

Gülnar Əliyeva