“Azərbaycanda inqilabi situasiya yoxdur”

Bu fikirləri Publika.Az-a açıqlamasında Ana Vətən Partiyasının sədri, millət vəkili Fəzail Ağamalı bildirib.

O, Demokrat Partiyasının (ADP) sədri Sərdar Cəlaloğlunun Azərbaycanda inqilabi situasiya olduğu barədə KİV-də gedən açıqlamasına münasibət bildirərək deyib ki, hər hansı epizodik narazılığa görə ölkədəki situasiyaya qiymət vermək, “diaqnoz qoymaq” düzgün deyil:

“S.Cəlalaoğlu Qubadakı hadisələri əsas götürür. Təbii ki, bu hadisədən ibrət götürülməlidir. Təkcə Qubada yox, digər regionlarda hər hansı hal olduqda, yerində tədbir görülür. Sadəcə lazımdır ki, icra başçıları mərkəzlə, nazirliklərlə əlaqələri möhkəmləndirsinlər, əhalinin problemləri ilə maraqlansınlar. Nazirliklərdə də buna maraq olmalıdır. Öz deputatlıq təcrübəmdən də deyə bilərəm ki, bölgələrdə olan vətəndaşların qayğıları ilə maraqlansan, onlarla diqqətli və həssas davransan, heç bir problem olmaz. Ümid edirəm, bundan sonra bölgədəki məmurlar öz danışdıqları ifadələrə, öz fəaliyyətlərinə diqqət edəcəklər”.

Bununla bərabər, F.Ağamalı qeyd edib ki, olanları şişirtmək lazım deyil:

“Ölkədə mənfi halların qarşısının alınması üçün davamlı tədbirlər görülür, tənqid və narazılığını bildirmək üçün müxalifətə geniş meydan yaradılır”.


Rüfət Əhmədzadə
Publika.az