Çingiz Abdullayev Rusiyanın prezidentliyə namizədinin anası haqda sirləri açdı

“İkrah oyadan fikirləri şərh etməyi sevmirəm. Ancaq bəzən biganə qalmaq mümkün olmur. Tanınmış demokratın həyat yoldaşı və rusiyalı prezidentliyə namizədin anası – senator Lyudmila Narusova mərhum Fərman Salmanovun ünvanına təhqiramiz ifadə işlətməyə cürət edib. Surqutda aeroporta onun adının verilməsinə razı deyilmiş”.

Publika.az xəbər verir ki, bunu Azərbaycanın xalq yazıçısı Çingiz Abdullayev deyib.

Yazıçı “Facebook” səhifəsində rusiyalı teleaparıcı Kseniya Sobçakın anası Lyudmila Narusovanın Sibirdə neft yataqlarını aşkarlayan Fərman Salmanovu təhqir etməsi ilə bağlı yayılan xəbəri şərh edib.

Onun sözlərinə görə rusiyalı “demokrat” xanım Surqut əhalisinin böyük əksəriyyətinin rəyini vecinə almır.

“Maraqlıdır ki, bu “demokrat” Surqut sakinlərinin çoxunun fikrini vecinə almır, halbuki hər adla bağlı ayrıca səsvermə keçirilib. Ancaq iş heç bunda da deyil. Riyakarcasına qeyd edir ki, aeroporta tələffüzü çətin olan azərbaycanlının adı verilib. Sən işə bir bax. Məsələ ondadır ki, xanım Narusovanın özü əsrimizin əvvəlində Tuvadan senator seçilib və bu postda Çanmır Udumbarı əvəzləyib.

Onun tuva dilində səlis danışmasına və Tuva adlarını ifadə edən zaman hər hansı çətinliklə üzləşmədiyinə heç bir şübhəm yoxdur. Məsələn, hökumət başçıları - Sarık-Donqak Çimbe və ya Adıq-Tülüş- Heçek ool. Tuvalılar məni bu müqayisəyə görə bağışlasınlar. Ancaq əlbəttə ki, onların tələffüzü Fərman Azərbaycan adından daha asandır. Mən prinsipial olaraq Salmanovun xidmətlərindən danışmıram. Heç kimin ünvanına belə düşməncəsinə çıxışlara yol vermək olmaz, həmin şəxsin xidmətləri və ya milliyyətindən asılı olmayaraq. Bu məsələdə isə insanlar seçib və şübhəsiz ki, onun verdiyi töhfələrə görə seçib!

Bir neçə ildən sonra Narusovanı Bryansk vilayətindən senator göndərdilər və üstündən çox keçməmiş səlahiyyətlərini əlindən aldılar. İndi o yenə də Tuva senatorudur. Bəzən belə şeylər olur. Ən təəcüblüsü odur ki, düz otuz il əvvəl onun mərhum həyat yoldaşı uzaq diyarlardan seçilmiş partiya funksionerlərini məsxərəyə qoyurdu”.

Müqayisə üçün yazıçı “Qarabağ” futbolçusu Mahir Mədətovun “Neftçi”yə qarşı matçdan sonra afrikalı futbolçuya qarşı etdiyi jesti misal göstərib.

“Dünən “Qarbağ”-“Neftçi” matçı keçirildi. Mən də o matçda (tamaşaçı qismində) iştirak edirdim. Oyun zamanı “Neftçi”nin müdafiəçisi Mamadu Mboca toqquşmadan sonra “Qarabağ”ın oyunçusu Mahir Mədətova əlini uzatdı. Gərginlik zamanı o, bu jestə cavab vermədi. Onu son zamanlar yaman tənqid edirlər, bəzən bu tənqidlər yersiz xarakter daşıyır, gənc və istedadlı futbolçunu gözüm-çıxdıya salırlar. Ancaq axşam saatlarında müdafiəçiyə ismarıc göndərərək, ondan üzr istəyib və bildirib ki, onun irqçi baxışları yoxdur, ola da bilməz. Mamadu Mboca da ona cavab verib. Xoşbətxtlikdən “Neftçi” müdafiəçisi də hər şeyi düzgün başa düşüb. Bu, bizdə multikulturalizmin olduğuna inanmayanlara, azərbaycanlıları digər millət və irqlərə qarşı qeyri-tolerantlıqda ittiham edənlərə bir dərs oldu.

İndi isə özünüz müqayisə edin. Bir tərəfdə aeroportun adlandırılmasından hiddətlənən senator Narusovanın etdiyi hərəkət. Digər tərəfdə azərbaycanlı və seneqallı futbolçuların etdiyi hərəkət. Şəxsən mən senatorun yerinə utanıram. Ən azından ərinin xatirəsinə hörmət edirsə, belə çıxışlar etməyə haqqı yoxdur”, - deyə Abdullayev sosial şəbəkədə yazıb.