İrəvan və Budapeşt diplomatik əlaqələri bərpa etdi - 10 il sonra

Ermənistan və Macarıstan tam diplomatik münasibətlərin bərpası barədə razılığa gəliblər.

Publika.az xəbər verir ki, bu barədə iki ölkənin xarici işlər nazirlərinin birgə bəyanatında deyilir.

“Dekabrın 1-də Lodzda ATƏT Xarici İşlər Nazirləri Şurası çərçivəsində Ermənistan və Macarıstanın xarici işlər nazirləri Ararat Mirzoyan və Peter Siyartonun görüşü baş tutub.

"Tərəflər erməni və macar xalqları arasında dərin tarixi və mədəni əlaqələrin və ümumi xristian irsinin olduğunu qeyd edərək, Ermənistan və Macarıstan arasında əlaqələrin yaxşılaşdırılmasının vacibliyini vurğulayıblar. Həmsöhbətlər, həmçinin rəsmi olaraq milli azlıq kimi tanınan Macarıstanın erməni icmasının iki ölkəni birləşdirən körpülərdən biri olan rolunu vurğulayılar.

Nazirlər Ermənistan və Macarıstan arasında münasibətlərin hazırkı mərhələsi ilə bağlı fikir mübadiləsi aparıblar. Onlar qarşılıqlı etimada və beynəlxalq hüquqa hörmət əsasında Ermənistan-Macarıstan münasibətlərində yeni səhifə açmaq niyyətlərini ifadə edərək, tam diplomatik münasibətlərin bərpası barədə razılığa gəliblər.

Görüşün davamı olaraq, iki hökumət arasında xüsusilə ticarət, mədəniyyət, təhsil və turizm sahələrində əlaqələrin inkişaf etdirilməsi imkanlarını araşdırmaq üçün qeyri-rezident səfirlər təyin olunacaq. Yaxın günlərdə lazımi diplomatik və inzibati prosedurlara başlanılacaq”, - məlumatda deyilir.

Xatırladaq ki, 2004-cü ildə Budapeştdə erməni zabiti Qurgen Markaryanın qətlə yetirilməsində günahkar bilinən Azərbaycan Ordusunun baş leytenantı Ramil Səfərovun Macarıstandan Azərbaycana ekstradisiya edilməsindən və Bakıda dərhal əfv olunmasından sonra - 2012-ci ilin avqustunda Macarıstanla Ermənistan arasında diplomatik münasibətlər dayandırılıb.

Səxavət