Yeddi uşağın ölüm işi: "Həkim küvəzin yandığını görsə də, körpəni çıxarmağa cəhd etməyib" - MƏHKƏMƏ

Respublika Perinatal Mərkəzdə yanğınla bağlı cinayət məsuliyyətinə cəlb edilmiş direktor Mehriban Abasquliyeva, Anesteziologiya, reanimasiya və intensiv terapeya şöbəsinin müdiri Hamlet Mustafayev, Dəstək xidmətləri şöbəsinin müdiri Elnur Əhmədlinin məhkəməsi keçirilib.

Publika.az Teleqraf-a istinadən xəbər verir ki, Bakı Ağır Cinayətlər Məhkəməsində hakim Leyla Əsgərova-Məmmədovanın sədrlik etdiyi prosesdə cinayət işi üzrə sənədlər tədqiq edilib.

Məhkəmə iclasında müşahidə kameralarının qeydə aldığı videolar izlənilib. Videoda içərisində yeni doğulmuş uşağın olduğu küvəzin yandığı görünür.

Mehriban Abasquliyeva həmin video görüntüyə münasibət bildirib: "Həkim küvəzin yandığını görsə də, körpəni oradan çıxarmağa cəhd etməyib. Həmin küvəzdən körpəni sonradan sanitar işçi çıxarıb".

Müşahidə kameralarından görünür ki, həkim Leyla Abdullayeva yeni doğulmuş uşaqların olduğu otağı tərk edərək divanda yatmağa gedir. İçəridə olan həkim Validə Əliyeva isə başının şöbədə olan sənədləri vərəqləməyə qarışdığı bildirilib.Videodan aydın olur ki, otaqda növbədə olan digər həkim Validə Əliyeva küvəzdə yanğın başlasa da, bu yanğını çox gec görür.

Daha sonra məhkəmədə hazırlıq iclasında baxılmamış saxlanılan vəsatətlərə baxılıb.

Həmin vəsatətlərin birində bir neçə nəfər zərərçəkənin cinayət işi üzrə zərərçəkmiş statusuna xitam verilməsi istənilib. Bildirilib ki, onlar tibb işçisi olub və özlərini zərərçəkən hesab etmirlər.

Hakim vəsatətə müşavirə otağında qiymət veriləcəyini bildirib.

Növbəti məhkəmə prosesi aprelin 29-na təyin edilib.

Qeyd edək ki, 2004-cü il yanvarın 9-da Respublika Perinatal Mərkəzində inzibati binasında yanğın baş verib. Baş Prokurorluq Cinayət Məcəlləsinin müxtəlif maddələri ilə cinayət işi başladıb, ibtidai istintaq Baş Prokurorluğun İstintaq idarəsinə tapşırılıb.

İstintaqla müəyyən olunub ki, Mərkəzin Anesteziologiya, reanimasiya və intensiv terapiya şöbəsinin Yenidoğulmuşların intensiv terapiya bölməsinin yerləşdiyi dördüncü mərtəbədəki palatasında baş vermiş yanğın nəticəsində 7 yenidoğulmuş körpə ölüb, 4 nəfər xəsarət alıb, müəssisəyə isə ümumilikdə 361 min manat məbləğində maddi ziyan vurulub.

Bundan başqa, Mehriban Abasquliyevanın 27 dekabr 2022-ci ildə Mərkəzin direktoru təyin edilməsindən sonra müəssisənin tibbi təminat resursları və potensialını nəzərə almadan xəstə qəbulu sayını iki dəfəyədək artırması nəticəsində müəssisənin elektrik təsərrüfatının artıq yüklənərək sonda yanğına səbəb olmasına əsaslı şübhələr müəyyən edilib.

Eyni zamanda istintaqla, Fövqəladə Hallar Nazirliyi tərəfindən Mərkəzdə yoxlamalar aparılaraq yanğın təhlükəsizliyi qaydaları, xüsusən də, mövcud avtomatik yanğın xəbərverici siqnalizasiya qurğusunun nasazlığı, daxili yanğın su kranlarının işlək olmaması və elektrik təsərrüfatında nöqsanların olması Mərkəzin rəhbərliyinə bildirilsə də, direktor və Mərkəzin Anesteziologiya, reanimasiya və intensiv terapiya şöbəsinin müdiri Hamlet Mustafayev və Dəstək Xidmətləri şöbəsinin müdiri Elnur Əhmədlinin nöqsanları aradan qaldırmamalarına əsaslı şübhələr müəyyən edilib.

Mərkəzin direktoru vəzifəsində işləmiş Mehriban Abasquliyeva Cinayət Məcəlləsinin 308.2 (ağır nəticələrə səbəb olan vəzifə səlahiyyətlərindən sui-istifadə) və 225.3-cü (yanğın təhlükəsizliyi qaydalarını pozma ehtiyatsızlıqdan iki və daha çox şəxsin ölümünə səbəb olduqda) maddələri, həmin mərkəzin şöbə rəisləri vəzifəsində işləmiş Hamlet Mustafayev və Elnur Əhmədli isə Cinayət Məcəlləsinin 225.3-cü maddəsi ilə təqsirləndirilən şəxs qismində cəlb edilərək onlara həmin maddələrlə nəzərdə tutulan ittiham elan edilib.

Cinayət işi üzrə Respublika Perinatal Mərkəzi, bundan başqa, Elçin Gülmalı oğlu Nəcəfov, Vaqif İntiqam oğlu Hacıyev, Aynurə Qalib qızı Əhmədova, Gülbahar Zülfüqarova zərərçəkmiş qismində tanınıblar.