Əliyevin sərəncamı və Ərdoğanın gəlişi ermənilərin manşetində: 3 min əsgər və 150 texnika növü ilə...

Türkiyə Prezidenti Rəcəb Tayyib Ərdoğanın Bakıda keçiriləcək hərbi parada gəlişi təsadüfi xarakter daşımır.

Publika.az xəbər verir ki, bu barədə "Sputnik Ermənistan"ın Bakıdakı paradın geosiyasi təsirlərindən söhbət açılan məqaləsində qeyd olunub.

Bildirilib ki, 10 dekabrda Bakıda keçiriləcək hərbi parad Azərbaycanın Dağlıq Qarabağdakı qələbəsini və Türkiyənin regional hərbi uğurunu qeyd edir. Paradda Türkiyə Prezidenti Rəcəb Tayyib Ərdoğanın olması NATO-nun Cənubi Qafqaz və Xəzər bölgəsindəki təsir zonasının genişlənməsini simvolizə edir.

Məqalədə Azərbaycan Prezidenti İlham Əliyevin Azərbaycanda Qələbə Gününün təsis edilməsi barədə sərəncamına və dövlət mediasının bu qələbəni çoxəsrlik milli tarixin əlamətdar hadisəsi kimi şərh etməsinə xüsusi diqqət çəkilib. Azərbaycan Dövlət İnformasiya Agentliyinin "Türkiyə Prezidenti Rəcəb Tayyib Ərdoğanın Zəfər Paradının fəxri kürsüsündə qonaq qismində iştirakı Türk qardaşlığının açıq təsdiqidir" sözləri də qeyd olunub.

Bildirilib ki, Türkiyənin "iki dövlət, bir millət" düzgün və möhkəm xarici siyasət konsepsiyası "iki dövlət - bir ordu" və vahid komanda mərkəzinin məntiqi davamı olacaq.

Qeyd edək ki, Bakıda qələbəyə həsr olunmuş hərbi parad üçün təlim davam edir. Paradda 3000-dən çox hərbi qulluqçunun və 150-yə yaxın hərbi texnikanın iştirakı nəzərdə tutulub. Paradda Vətən müharibəsi zamanı düşməndən ələ keçirilmiş qənimətlərin bir qismi də nümayiş olunacaq.

Zümrüd